Quppernermi uani suliffimmi sungiusarneq pillugu atuarsinnaavat – Tassunga ilanngullugu sunik imaqarnersoq sunillu piumasaqaatitaqarnersoq.
Inuit tamarmik Kalallit Nunanniittut suliffeqarnissamut periarfissaqassapput. Suliffeqaruit ilinnut ilaquttannullu pilersuisinnaassaatit. Suliamik isumaginnissinnaaniassalluni inuusuttut suliatigut piginnaasaqarnissaminnut sungiusarnissaminnut pisariaqartitsisinnaapput, taakkulu suliffimmi sungiusarnikkut pissarsiarineqarsinnaallutik.
Suliffimmi sungiusarnermi ilaatigut ilinniassavatit:
- Sannavimmiinneq
- Suliffimmik paarsineq
- Ullaakkut makinneq
- Imminut akisussaaffigineq
Aamma ilinniagassat arlaat kingusinnerusukkut inuussutissarsiummik ilinniagaqarnikkut ilinniarfigisinnaasat misilerarsinnaavat.
Malugiuk
Majoriamit sulinermik sungiusarnissamik neqeroorutigineqarsinnaasut amerlassusaat killeqarput.
Ilinniarluni tigusaanissamut piumasaqaat
Suliffimmi sungiusassaguit 16-it -29-llu akornanni ukioqalereersimassaatit. Piffissami tassani suliffeqassanngilatit imaluunniit ilinniakkamik ingerlataqassanngilatit.
Inersimasut 29-t qaangerlugit ukioqartut iliuusissatut pilersaarutaat tunngavigalugu Majoriamit innersuunneqarsinnaapput.
Sivisussusaa
Suliffimmi sungiusarneq nalinginnaasumik qaammatini pingasuni arfinilinniluunniit sivisussuseqartarpoq suliffimmilu misiliiffimmi pisarluni.
Sulinermut suliffimmullu sungiusarnerpit nalaani suliffimmi misiliiffimmi sulisitsisumit akisussaaffigineqassaatit. Sulisitsisoq Majoriami ilitsersuussisunnut attaveqartarpoq peqatigiillutillu sulinermut suliffimmullu sungiusarnerpit nalaani ilitsersuussallutit ilinniagaqaqqinnissannullu aamma sulilernissannut kaammattussallutit.
Sulinermut suliffimmullu sungiusarnerit qaammatinik pingasuni sivitsorneqarsinnaavoq illit ilitsersuussisullu isumaqarussi tamanna pisariaqartikkit.
Ilinniagaqarnersiutit
Suliffimmi sungiusarnerni ilinniagaqarnersiutisisinnaavutit. 18-ileereersimaguit qaammammut 5.002 koruuninik ilinniarnermusiaqartarsinnavutit, 18-it inorlugit ukioqaruit, qaammammut 2.529 koruuninik ilinniarnermusiaqartarsinnaavutit. Meeqqat ataasiakkaarlugit qaammammut 1.060 koruuninik meeqqamut tapisiaqartoqarsinnaavoq.
Unioqqutitsillutit suliffimmukartarsimanngikkuit, suliffimmik misiliiffiit illoqarfinni Majoriamut ilitsersuussisunnut nalunaaruteqassaaq. Kingornatigut tiimini peqanngittarnitit ilinniagaqarnersiutisianninngaanniit tiguneqassapput.
Sapaatip akunneranut 40 tiimit sinnerlugit sulisaruit, suiffimmik misiliiffippit tiimini sulinerusimaninnut akilissavaatit.
Qinnuteqaat
Sulinermut suliffimmullu sungiusarnermik ingerlatsinissamik aallartitserusukkuit, illoqarfinni Majoriamut saaffiginnissaatit. Matumani ilitsersuussisoq iliuusissamik pilersaarusiussaaq, ilaatigut nassuiaalluni sooq aamma fagip suup iluani sulinermut suliffimmullu sungiusassanersutit.
Illoqarfinni Majoriaq nassaariuk
Kingornatigut qinnuteqarnissamut immersugassamik pissaatit, immersoriarlugu Majoriamut illoqarfinniittumut tunniutissavat. Iliuusissatut pilersaarut naapertorlugu suliffimmik misiliiffissamik tulluartumik, matumani sulinermut suliffimmullu sungiusarfigisassannik kingornatigut nassaarniassaasi.
Nammineerlutit aamma suliffimmik misiliiffissamik nassaarsinnaavutit. Nammineerlutit suliffimmik misiliiffissamik nassaaruit siunnersortimit akuerineqassaaq.
Ukioq tamaat kaajallallugu sulinermut suliffimmilu sungiusarfigisassami tiguneqarnissannut qinnuteqarsinnaavutit.
Suliffimmik misiliiffimmi sulinermi maleruagassat
Ataasinngornermiit tallimanngornermut sulinerup nalaani sulinermut suliffimmilu sungiusarfigisamiikkaangavit nalinginnaasumik ullormut 8 tiimit sulisussaavutit. Suliffimmik misiliiffiit piffissani allani sulinissamut naatsorsuuteqarpat tiimit suliffissatit pillugit sullissisullu isumaqatigiissutigissavasi.
Piffissat isumaqatigiissutaasut saniatigut naapissagaanni suliffimmik misiliiffinni maleruagassat nalinginnaasut aamma malissavatit.
Suliffimmik misiliiffippit immikkut ittunik sullisissanik atisaqarnissamut piumasaqaateqarpat, suliffimmit misiliiffimmit atukkerneqassaatit.
Nakorsiassaguit imaluunniit Majoriami ilitsersuussisunninngaanniit ilitsersuunneqassaguit, sulinngiffeqarsinnaavutit. Sulinngiffeqassaguit suliffimmi misiliiffinni attaveqarfiit isumaqatigiissuteqaqatigissavat.
Napparsimanerit pissutigalugu suliartorsinnaanngikkuit suliffimmi misiliiffinni attaveqarfinnut nalunaaruteqassaatit.
Ajornartorsiutit naammagittaalliuutillu
Sulinermut suliffimmilu sungiusarfigisamiitsillutit ajornartorsiuteqalissagaluarpat aaqqiagiinngittoqarluniluunniit illoqarfinni Majoriami ilitsersuussisut attavigissavat. Assersuutigalugu imaassinnaavoq:
- Suliffimmi misiliiffinni pitsaasumik pineqarlutit misiginak
- Sulinermi qaangiuttoornersiaqartinneqarneq ajorputit
- Paasilerpat suliaq ilinnut soqutiginartuunngitsoq
Illit ilitsersuussisullu peqatigiillusi ajornartorsiutaasut annertussusaat qanorlu iliortoqassanersoq pillugit nalilersuisinnaavusi. Assersuutigalugu imaassinnaavoq:
- Ilitsersuussisut sullissisunnut attaveqarsinnaavoq
- Suliffimmik misiliiffissamik allamik nassaassaasi
Naammagittaalliuteqarneq
Suliffimmik sungiusarnermik ingerlatsinissannut tiguneqanngikkuit naammagittaalliorsinnaavutit. Naammagittaalliorusukkuit, najukkami Innuttaasunik Kiffartuussivimmut imaluunniit nunaqarfimmi kommunip allaffianut saaffiginnissaatit.