Nunatsinni kommunit allat suleqatigalugit paasissutissiisarnissamut nittartagaq atulerpoq. Corona-virusimut tunngatillugu susoqanersoq innuttaasut CORONA.GL-ikkut paasissutissinneqartassapput. CORONA.GL-ikkut apeqqutitit akineqarsinnaapput aamma Nuummi Nunattalu sinnerani suliniutit suut atuunnersut takuneqrsinnaallutik. Paasissutissat Nunatsinni Nakorsaaneqarfimmeerput.
Corona-virusimut tunngatillugu malittarisassat suut atuunnersut aamma qanoq iliortoqartassanersoq paasiuminaassinnaavoq. Innuttaasut paasissutissanik ujaaserujussuanngikkaluarlutik CORONA.GL-ikkut paasiniaasarsinnaapput. Nittartakkami siunertarineqarpoq, Nunatsinni Nakorsaaneqarfimmit paasissutissat pingaarnerpaat katersoriarlugit nassaariuminartunngortinnissaat, taakku atorlugit malittarisassat suut malinneqassanersut aamma tunillatsissanngikkaanni suut pinaveersaarneqassanersut.
– Corona-virusimut tunngatillugu nunami maani susoqarsinnaanersoq aamma susoqaqqusaannginnersoq pillugu kommuninut paasissutissanik ujartuisarneq misigereerparput. Taamaattumik Nuummi nunallu sinnerani malittarisassat suut atuunnersut pillugit paasissutissanik peqartoq CORONA.GL ataatsimoorluta pilersipparput. CORONA.GL-ikkuttaaq apeqqutit nalinginnaasut akineqartassapput, Kommuneqarfik Sermersuumi kommunaldirektøri Lars Møller-Sørensen nassuiaavoq.
Nittartakkakkut oqartussaniit aamma pingaartumik Nunatsinni Nakorsaaneqarfimmiit paasissutissanik peqartassaaq, aamma soorunami kalaallit qallunaatullu allaqqassapput. Nittartakkami alloriaqqittoqarpoq paasissutissallu innuttaasut kalaallisut qallunaatulluunniit paasisinnaanngitsut eqqarsaatigalugit tuluttuunngortinneqarlutik.
– Paasissutissat Nunatsinni innuttaasunut tamanut aqqutit tamaasa atorlugit apuuttarnissaat pingaaruteqarluinnarpoq. Matumani innuttaasut tuluttut oqaaseqartut ilanngullugit. Aamma kommunit killeqarfii oqartussallu akimorlugit suleqatigiinnissarput pingaaruteqarluinnaqqissaarpoq. Aqqusaakkatta qaangernissaanut tamatta akisussaaffeqarpugut, kommunaldirektøri oqarpoq.
Nittartakkami CORONA.GL-imi malittarisassat atuuttut atuarsinnaavatit, apeqqutitit akineqarsinnaapput aamma suut ilumoornersut ilumuunnginnersullu paasiniarsinnaavatit.