Nuummi meeqqeriviit AKO-llu 19. marsimi matuneqaramilli matoqqareerlutik ataasinngorneq ulloq 20. apriili ammaqqissapput. Taamaalilluni angajoqqaat meeqqatik meeqqeriviinukaassinnaanngoqqilerpaat.
Meeqqeriviit tunngaviatigut nalinginnaasumik ammassapput, meeqqalli amerlasuut qaammat meeqqerivimmiissimannginnerat pillugu naatsorsuutigineqassaaq, aallartisarnermi ilungersunartorsiortoqartarsinnaasoq.
”Pingaarnerpaatipparpulli meeqqat meeqqerivimminnut uteqqinneranni taakkununnga sapinngisamik toqqissisimanartuutinneqarnissaa. Meeqqeriviilli ilaat nalinginnaasumik meeqqat amerlassuserisartagaatulli amerlatigisunik meeqqerivimmiititsisinnaassanngillat. Taamaattoqartillugu, meeqqerivimmi aqutsisut piffissami siullermi meeqqanik tigusinissamik itigartitsisinnaatitaassapput, tassa angajoqqaajusut inuiaqatigiinnut pingaarutilimmik suliffeqarsimanngitsut pineqarpata”, Meeqqanut Atuarfeqarnermullu Ingerlatsivimmi pisortaq Lone Nukaaraq Møller oqarpoq.
Meeqqat akornanni tuniluussinnaaneq pakkersimaarniarlugu meeqqerivinni arlalinnik suliniuteqartoqarpoq.