Ukiup aappassaani umiarsualivik Sikuki Nuummi Apummik Ilusilersuisoqarnerani ornigarneqarluarpoq, umiarsualivimmilu ilusilersugarpassuit akornanni ilusilersuisutut ajugaasut toqqarneqarmata nuannattunnguaqarpoq.
– Nuannersorujussuarmik ingerlanneqarpoq, Nivi Christensen, Nuummi Eqqumiitsulianik Saqqummersitsivimmi aqutsisoq, ajugaasut toqqarneqareermata, oqaluttuarpoq.
Nivi aaqqissuussineq marsip tallimaaniit arfineq-pingajuata tungaanut ingerlanneqarmat akisussaasut ilagaat.
– Taamatut aaqqissuussisarneq nuannersorujussuusarpoq, inunnik kateritsitsisarmat. Takuniaasut kisiisa pinnagit, aammali eqqumiitsuliortut kajumissutsiminnillu ikiuuttartut takkuttarput, taavalu meeqqat inersimasullu tamarmik peqataaffigisinnaasarlugu. Inuppassuit naapinngisaannakkat oqaloqatiginngisaannakkallu naapinneqartarput. Nuannersumik katerittoqarpoq, ingerlalluartoqarlunilu, Nivi nuannaaqisoq unnersiorpoq.
Ajugaasumik toqqaaneq
Ullut sisamaat avillugu peqataasut 15-it suleruloreersullu ilusilersugassarpassuit 3x3x3 meterit naammassipput sapaatiummallu ualikkut nalilersorneqariaannanngorlutik.
Kommuneqarfik Sermersuumi borgmesterip tullia siulleq Uju Petersen, ajugaasunik toqqaanermi pinnatsitsinermilu oqalugiartuuvoq. Oqalugiarnermini peqataasut pilersitsisinnaanerat kusanartuliorsinnaanerallu nersualaarpai, kajumissutsiminnik suleqataasut sulilluarnerat aningaasaleeqataasullu Nuuk Snow Festivalip piviusunngornissaanut ikiuulluarnerat qujamasuutigalugu.
Immikkoortuni marlunnik ajugaaniuttoqarpoq: Piviusumik assilisat aammalu eqqumiitsuliat.
Eqqumiitsuliani ajugaasut tassaapput:
- Ilinniarfissuaq
- Naboerne
Ilinniarfissuup ajugaassutigisamisut ilusilersugaa:
Piviusunik assilisanik ilusilersuinermi ajugaasuupput:
- Team Balkan
- Team Kaassassuk
- Eqqu aamma Midget and Minions (nr. 3 avillugu)
Team Balkanip ajugaassutigalugu ilusilersugaa: