Nuummi angerlarsimaffinni eqqakkanik assartuinermut isumaqatigiissut nutaaq januaarip aallaqqaataanit atuutilerpoq. Eqqakkanik assartueriaatsit piureersut pillugit eqqagassalerisussamillu isumaqatigiinniarnerit, tassani pineqarluni suliffeqarfik – Nuuk Transport, sivisuumik igerlanneqareersullu atsioqatigiittoqarluni. Suliassat tassaallutik illoqutigiit eqqaaviisa imaarneqartarnissaannut kommunimullu nalunaarsimasut eqqagaasa assartorneqartarnissaat, isumaqatigiissulluni ukiuni arfineq marlunni atuuttussatut atsioqatigiissutigineqarluni. Isumaqatigiissutip ukiunik arfineq marlunnik sivisussuseqarnerata pilersissavaa, eqqagassalerisut atortunik nutaanik angallassissutinillu pitsaanerusunik isumannaannerusunillu pissarsinissaannut periarfissinneqarnissaat.
Illoqutigiit eqqaaviisa piffissami aalajangersimasumi imaarneqartarneri allanngussanngilaq
“Nuuk Transportimik suleqateqaannarneq Sermersuup Eqqagassaleriffianit nuannaarutigaarput, eqqakkanillu assartuisarnerup allanngunnginnissaa nalunaarutigisinnaallutigu, tassami eqqakkanik assartuisartut ukiortaaq manna tikillugu assartuinermik misilittagaqarluarnerat ingerlaannartussaammat. Illoqutigiillu eqqaaviisa piffissami aalajangersimasumi imaarneqaartarneri innuttaasunit naatsorsuutigiinnarneqarsinnaasoq maluginiaqqussavarput” Kommuneqarfik Sermersuup Avatangiisit pillugit pisortaa, Frank Rasmussen oqarpoq.
Eqqaavinnik imaarsisarnermi atortorissaarut chip atorneqarpoq
Illoqutigiit eqqaaviissa tamarmik ullorlu eqqortoq Nuuk Transportimit imaarneqartarneri atortorissaarut chip-I atorlugu ingerlanneqartarpoq. Atortorissaarutip chip-ip takutissinnaavaa eqqaaviit sumiittut suli imaarneqarsimannginnersut. “Atortorissaarutip chip-ip atulernerata kinguneraa, Eqqagassaleriffimmut inuit saaffiginnittartut malunnaarteqarluartumik ikileriarsimaneri. Tassami 2018-imi inuit saaffiginnittut 775-iusut 2019-imi 500-nik ikileriarlutik 267-iinnanngorsimapput, tamannalu nuannaarutissaavortaaq” Frank Rasmussen naqissusiivoq.
Eqqagassalerisut pitsaanerusumik atugassaqartinneqaleneri
Nuummi eqqakkanik assartuinermut atatillugu isumaqatigiissusiornermi sulisut pitsaanerusumik atugassaqartinneqqarnissaat atsioqatigiinnermi aamma ilaatinneqarpoq. Taamaalilluni eqqaaviit sumut inissinneqarsimanersut Sermersuumi Ikuallaaviup immikkut eqqumaffigilissavaa, tassunga innersuussutigineqarlutik, 2018-imut Inoqutigiit eqqagaat pillugit malittarisassiat, soorluttaaq, kommunip eqqakkat pillugit malittarisassaata 2021-miit atuuttussap sukannernerulernissaa allanngortinneqarnissaalu sulissutigineqassasoq.
Eqqakkanik immikkoortiterineq imaluunniit naamik?
Eqqakkat igalaamerngit poortuutissallu savimerngit immikkoortiterneqartalernissaat eqqakkanullu naliginnaasunut akuutinneqartannginnissaat Sermersuup Eqqagassaleriffiata sivisuumik eqqarsaatigeqqissaarsimavaa. “Eqqakkat immikkortiterneqartarnissaannut periarfissiinissaq soqutigiuaannarparput aammalumi immikkortiterisinnaasunik suleqatissatinnik soqutiginnittoqartoq ilisimallutigu. Tamassuma suli aallartisannginneranut pissutaaneruvoq igalaamerngit savimerngillu akilerlugit qaqugu utertinneqartalissanersut suli aalajangerneqanngimmat. Utaqqqisagullu tassaaginnarput Namminersorlutik Oqartussat tamassuminnga aalajangiinissaat” Frank Rasmussen oqaluttuarpoq.
Eqqakkanik assartuinermut eqqakkallu pillugit apeqqutit
Kommuni aqqutigalugu eqqaaviit imaaneqartarnerannut isumaqatigiissuteqaruit eqqakkat qaqugukkut aaneqartarnissaat imaluunniit eqqakkat naliginnaasut pillugit apeqqutit tamarmik Sermersuup Eqqagassaleriffianut saaffiginnittoqartassaaq eqqavinnik imaarsisartunuunngitsoq. Apeqqutit suulluunniit Eqqagassalerifimmut apuunneqartarsinnaapput ataasinngortmiit tallimaggorneq ilanngullugu nalunaaqutaq ullaakkut quliniit ullup qeqqata tungaanut, qarasaasiaq atorlugu uunga allalluni affald@sermesooq.gl imaluunniit oqarasuaammut uunga sianerluni 36 74 11. Facebookikkut aamma malinnaavigineqarsinnaavut uani “Sermersooq Affaldscenter”, tassani nutaarsiassat kingulliit ingerlatsinermullu tunngasut aamma atuarneqarssinnaallutik. Facebookikkut ugguuna malinnaasinnaavutit: https://www.facebook.com/Affaldscenteret/