Ullumikkut septembarip tallimaani nuna tamakkerlugu erfalatserfiuvoq. Sakkutuunut nunartik qimallugu aallartitanut qujaniarfik.
Ulloq malunnartinniarlugu Kommuneqarfik Sermersuumi borgmester Charlotte Ludvigsen sakkutuujusimasunut qaaqqusivoq oqalugiarlunilu, qaaqqusinerlu Nuummi kommuunip ataatsimiittarfiani ingerlanneqarpoq.
”Ilassinissassinnut qilanaarsimaqaanga, nunarsuatsinnullu toqqissisimasumik tunniussaqarsimanersi qujamasuutigaara, tamassi ataasiakkaarlusi tunniussaqarsimavusi, massakkulli ataatsimoorluta nersorniarnerput takutikkusupparput,” borgmester Charlotte Ludvigsen oqarpoq.
Nuna tamakkerlugu sakkutuujusimasunut nersorniaarluni erfalatsertarneq ukiut qulit matuma siorna aallartinneqarpoq.