Aqqusineq parnaarussiviup nutaap tungaanut ingerlavoq kangerlummullu isikkiveqarluni.
Borgmesterip tullersortaa Uju Petersen atsiussisoqarmat peqataavoq: ”Tulluusimaarutigalugulu nuannaarutigaara aqqusineq Miilumut atsiussinnaagatsigu – tassalu Miilup aqqutaa. Eqqaamaneqartuassaaq. Malunnartinneqarnissaa pissusissamisoorpoq. Aqqusineq Nuummi innuttaasunit ullut tamaasa aqqutigineqaraangat – eqqaamaneqartuarnissaa pissusissamisoorpoq”, Uju Petersen oqarpoq.
Miilup kulturimut tunngasunik soqutigisaqarluarnini ilisarisimaneqaatigaa.
Ajoqitut ilinniartitsisutullu Ilinniarfissuarmi ilinniarsimavoq, kingusinnerusukkullu Danmarkimi ilinniagaqaqqilluni. Kalaallisut allattaasitaaq 1970-imi suliaralugu aallartippaa, Oqaatsinut allannermullu ataatsimiititaliami siulittaasuulluni. Miilu kalaallisut oqaatsitsinnut annertuumik sunniuteqarsimavoq, KNR-Radiomilu aallakaatitassiami Aperiinnariarimmi nuannarineqarlunilu ilisimasimaneqaatigalugu ukiorpaalunni peqataasarsimalluni.