Nunat Avannarliit Siunnersuisoqatigiit ulluni makkunani Nuummi siullermeerlutik ataatsimiipput
Kommuneqarfik Sermersuup Borgmesteriata, Asii Chemnitz Narup, ullumi Nuummi Nunat Avannarliit Siunnersuisoqatigiinnit angalasut siullermeerlutik ataatsimiilersut illoqarfimmut tikilluaqquai.
”Avannaamioqatigiilluta ilinniutigisinnaaqaagut tunniussassanillu immitsinnut ulikkaarluta, kulturikkut inuiaqatigiillu akornini oqaluttuassartavut ukiut 1000-t sinnerlugit qanimut nermussimasutullusooq illuta assigiinngitsorpassuartigut ataqatigiippugut.
Avannaamioqatigiilluta immitsinnut pisariaqartippugut; eqqaamiut pitsaasut pisariaqartippavut, taakkuummata tapersersortigisinnaallugillu tarrarsorfigisinnaasavut” Asii Chemnitz Narup oqalugiaatimini oqarpoq.
Taava angalaqatigiit oqaluttuarput, Nunat assigiinngitsut akornanni illoqarfik pingaarneq sakkortuumik ineriartortoq tikissimallugu.
”Ukiuni makkunani Nuuk sukkasoorujussuarmik ineriartorpoq taamaattoqartillugu immikkut ittumik nuannaarutissinneqartarpugut allanillu avitseqatiginnerusulersarluta.
Allaat maani ineriartorneq ima sukkatigaaq ilaatigulluunniit malinnaaneq ajulersarluta.
Taamaattumik kommunimit aamma iternga tikillugu illoqarfiup ilaani nutaaliorneq aallupparput soorlu aamma anginermik mittarfittaarnissaq taperserniarlugu sutigut tamatigut tapersersuisugut, siunissami aatsaat iluamik nunanut tamalaanut illoqarfik pingaarnersatut nukittuutut angujuminartutullu saqqummernissarput piviusunngortissinnaalissagatsigu”, Kommuneqarfik Sermersuumi borgmesteri oqarpoq
Nunat Avannarliit Siunnersuisoqatigiit ullut marluk Nuummi ataatsimiissapput. Pingasunngorneq sisamanngornerlu. Silaannaap allanngoriartornera meeqqallu ikiortariallit ilaatigut programmimi sammineqassapput.