Borgmesteri, Charlotte Ludvigsen, ullumikkut sisamanngornermi decembarip ulluisa pingajuanni, Tasiilami nunaqarfiinilu pitsaanerusumik interneteqalernissaq anguniarlugu nunami radioqarfimmi nutaamik isiginnaarutikkut nappaanersiornermi peqataassaaq.
Tele Greenlandip Kommuneqarfik Sermersuullu suleqatigiinneratigut Tasiilami internetip pitsanngorsarneqarnissaa piviusunngortinneqarpoq. Pilersaarutip piviusunngortinneqarnissaanut ukiumut 5 mio. koruuninik Kommunalbestyrelse aningaasaliisassaaq.
”Interneti nalinginnaasumik kommunimit susassarineqarneq ajorpoq, taamaakkaluartoq interneti atorlugu periarfissatsialaat innuttaasunut atorluartinneqannginneri Kommunalbestyrelsimit isiginnaaginnarsinnaanngilagut. Atuarfimmi internetip pitsaanerulerneratigut periarfissaqalerneruneq immikkut nuannaarutigaara. Maanna Tasiilami meeqqat kommunip sinnerani atuartut assigalugit iPadit atorlugit atuartinneqarsinnaanngorput”, Kommuneqarfik Sermersuumi borgmesteri, Charlotte Ludvigsen, taama oqarpoq.
Tamatumunnga peqatigitillugu internetip pitsaanerulernerani Tasiilami kommunip sullissisarneranut sunniuteqangaatsiassaaq. Ulloq manna tikillugu Tunumi atortorissaarutit kommunitta sinnerani atortorissaarutit assigalugit sulisinnaasimanngillat, pissutigalugu atortorissaarutaat bredbåndimik atuivallaartuummata.
“Maanna nutaaliaasumik pitsaasumillu sullissinermi atortussanik eqqortunik peqalerput. Tele Greenlandimik suleqateqarnerput nuannaarutigeqaarput. Ataatsimut anguniagaq pillugu suleqatigiinnitsigut qanoq angusaqartigisinnaanersugut takullugu nuannerpoq”, Charlotte Ludvigsen oqarpoq.
Pitsaanerusumik interneteqalernissamut alloriarneq siulleq
Ukiuni tulliuttuni attaveqaatit Tele Greenlandimit pitsanngorsarneqarlutillu iliuuseqarfigineqassapput. Piviusunngortitsineq ukioq manna Tasiilami aappaagulu Ittoqqortoormiini pissaaq. Nunami issittumi avinngarusimasuusuni telemik attaveqaatit suliarinissaannut atortut immikkut pigisariaqarput, aamma iluatsinneq tamatigut siuariartortuaannanngilaq.
”Qaammataasanik aaqqiissutit pitsaanerpaat atorlugit imaatigut kabelimik atuisunut assinganik kiffartuussisoqarsinnaanngilaq, taamaakkaluartoq qaammataasat atorlugit interneteqartut ullumikkumut naleqqiullugu pitsaanerusumik atugaqalernissaat qulakkeerniarlugu ilungersuutigaarput. Kommuneqarfik Sermersuumik suleqateqarnitsigut tamanna periarfissaalerpoq”, Tele Greenlandimi pisortaaneq, Kristian Reinert Davidsen, oqarpoq.
Tasiilami Nunami radioqarfik nutaaq antennillu pioreersup nutaalianngortinnera ullumikkut napparneqarput, taakkulu takutippaat annertuumik iliuuseqartoqarsimaneq, suleqatigiilluarneq taavalu Tele Greenland A/S-ip suleqataasa Tasiilamilu najukkami sanasut akornanni suleqatigiilluarneq. Tele Greenlandimi pisortaaneq, Kristian Reinert Davidsen ullormi pisumut ima oqaaseqarpoq:
”Tasiilami nunaqarfiinilu atuisugut tamaasa pilluaqqorusuppavut, aamma qaammataasat aqqutigalugit telemi attaveqaatinik atuisoqarfiit pitsanngorsaaviginissaannut alloriarnermut siullermut sulinermi ajornaatsuinnaanngitsumi sulilluaqataasimasut minnerunngitsumik qutsavigaakka.”