Aasaanerani atuanngiffeqareernerup kingorna aggustip qaammataata qiteqqunnerani kommunini tamani pissusissamisut atuartut isaanissaannut sianeq sianertinneqassaaq. Taamaakkaluartoq ulloq atualeqqaarfik pissusissamisuussanngilaq, tassami COVID-19 pissutaalluni maleruaqqusaqassagami. Illit angajoqqaatut suut eqqumaffigissaneritit una atuaruk.
Atualeqqaarfik meeqqanut angajoqqaanullu immikkuullarittuaannarpoq, aamma ukioq manna immikkuullarittussaavoq naak ilaatigut allaanerussuteqalaartussaagaluarluni.
COVID-19 pillugu killiffik maleruaqqusallu allanngorartuarput, atualeqqaarfimmilu tamanna malugineqanngitsoornavianngilaq. Atuarfiilli nalinginnaasumik skiima malillugu amerlanerpaatigut ingerlajumaarput. Illoqarfimmi atuarfiit nunaqarfimmilu atuarfiit soorunalimi assigiinngissuteqarput, aallaaviatigulli nuna tamakkerlugu maleruaqqusat atuuttut tassaapput:
- Ullormi aaqqissuussat sapinngisamik silami ingerlanneqassapput.
- Angajoqqaat atuartullu kisimik atuarfimmut isersinnaapput aamma atuartut ilinniartitsisullu kisimik klassimut isersinnaapput.
- Atuarfinni anginerpaani atuariartorfissat nikingasinnaapput.
Soorunami puigorneqassanngilaq meeqqat atualertussanut angajoqqaajusunnullu ulloq atualeqqaarfik tassaammat immikkuullarissoq puigunaatsorlu. Taamaammat kommuniniit tamaniit atuartunngortunut atualersitsisunullu tikilluaqqusillutalu pilluaqqusivugut.