Covid-19 pissutigalugu pissutsit immikkut ittuunerat tunngavigalugu Sermeq Puljen kulturikkut suliniutit, aningaasaqarnikkut taperserneqartussatut qinerneqartut siumut akuerereerpai. Tamanna pissaaq, suliniutit naammassineqarsinnaanersut, aamma Covid-19-imut atatillugu killilersuinerit pissutigalugit siunissami qaninnermi nalunartoqaraluartoq misissorniarlugu .
”Kulturip siuarsarnissaa pillugu iliuuseqarusuppugut, taamaattumik ajuusaarnartorujussuuvoq, Covid-19-ip inuiaqatigiit tamaasa taama sakkortutigisumik eqqormagit. Kisianni innuttaasut peqqinnerat salliuttariaqarparput. Taamaattumik maanna misissuleruttorparput, kulturi qanoq tapersersorsinnaanerlugu, inuiaqatigiit peqqinnerat aarlerinartorsiortinngikkaluarlugu”, taama oqarpoq borgmester Charlotte Ludvigsen, aamma Kulturimik siuarsaaneq pillugu Siunnersuisoqatigiinni siulittaasuusoq.
Kulturimik siuarsaaneq pillugu Siunnersuisoqatigiit katillugit qinnuteqaatinik 39-nik tigusaqarput. Ataatsimiinnermi aalajangerneqarpoq suliniutit qulit katillugit 839.506 kr.-inik taperserneqassasut.
Suliniutit siumoortumik akuerineqartut, eqqumiitsulioriaatsini tulliuttuni agguarneqarput:
Filmiliorneq aamma videoliorneq: 1
Isiginnaartitsineq aamma takutitsineq: 2
Kulturikkut kingornussat: 3
Nipilersorneq aamma erinarsorneq: 2
Allat: 2
Qinnuteqarfissap tullia ulloq 1. oktober
Sermeq Puljen ukiumut marloriarluni qinnuteqaatinik tigusisarpoq, qinnuteqarfissallu tullia kingusinnerpaamik tassaavoq 1. oktobari. Qinnuteqarnissamut piumasaqaatit pillugit uani paasisaqarnerusinnaavutit.