Sapaatip akunnerata siuliani Inatsisartuni Siumut-gruppimiit siunnersuut ataatsimiititaliami suliarisassanngorlugu nassiunneqarpoq. Siunnersuut malillugu qallunaatut innuttaassuseqartut, Kalaallit Nunaannut nuussimasut, Inatsisartunut aatsaat qinersisinnaassapput Kalaallit Nunaanni ukiuni marlunni najugaqarsimagunik, ullumikkut qaammatini arfinilinni najugaqarsimanissaq piumasaqaataasoq. Siunnersuut Kommuneqarfik Sermersuup borgmesterianut Charlotte Ludvigsenimut assut tupaallatsitsivoq.
“Uagut maanga nuuttut inuiaqatigiinni peqataanissaat ineriartortitseqataanissaallu kissaatigivarput. Suliumalluni nunamut allamut nuunneq pillaataasariaqanngilaq, tassani inuup taasisinnaatitaaneranik ukiuni marlunni arsaarlugu. Akileraartarnermi akileraarutaannik piumapput, kisiannili taasisinnaatitaanerannik tuniumanagit. Tamanna kukkusuusoq isumaqarpunga”, Charlotte Ludvigsen oqarpoq.
Borgmesterimit annilaanngatigineqarpoq tamanna pisut, tassalu tamat oqartussaaqataanerannit partiimik salliutitsineq, ilagigaat.
”Paasisinnaavara, partiit ilaasa qinersisartut ataasiakkaat ilaannik sunniuteqartitsinnginnissaq torrallataasutut isumaqarfigissappassuk, kisianni siunnersuut uanga upperalugu isummannut akerliulluinnarpoq. Isumaqarama demokratiimik ingerlanerput pitsaanerulissasoq pitsaanerulerlunilu innuttaasut amerlanerusut peqataasinnaappata peqataarusullutillu. Inuit ilaannit taasisinnaatitaanermik arsaarinninneq ajortumut alloriarnerujuaannarpoq”, Charlotte Ludvigsen oqarpoq.