Kommuneqarfik Sermersuup nutaamik isumaqatigiissusiornissamut 60 millionit koruuninik nalilimmik killilimmik suliariumannittussarsiuussivoq
Kommuneqarfik Sermersuumut qarasaasialerineq annertooq apriilip 29-at 2020 aallarnerfigalugu killilimmik suliariumannittussarsiuunneqalerpoq. Suliariumannittussarsiuussinermut allagarsiussaq Nuuk Ugeavisimi kiisalu kommunip nittartagaani atuarneqarsinnaavoq.
Siullermik piukkunnarnersiuineq pissaaq kingornalu neqerooruteqartitsisoqassalluni.
– Suliariumannittussarsiuussinissaq qangali piareersarparput, massakkullu killilimmik suliariumannittussarsiuussisoqarsinnaanngormat nuannaarutigeqaarput. Taamatullu aamma nalaataqarnerlunnitta nalaani unammilleqatigiilluarsinnaanerup ingerlaannarsinnaanera nuannaarutigigipput, taamaalillunimi qarasaasialerisut pikkorissut soqutiginnittullu neqerooruteqarnissamik periarfissaqalersinnarput, Gerth Jakobsen, Kommuneqarfik Sermersuumi digitaalinngorsaanermut pisortaq oqarpoq.
Isumaqatigiissut ukiumut 10 millionit koruunit missaanik naleqarpoq, ukiunilu arfinilinni aaqqissuussaasumik suleqatigiinneq atuutissalluni.
Kommuneqarfik Sermersuup nittartagaanni suliariumannittussarsiuussinermut allagarsiussaq una toorlugu atuaruk