Kommuneqarfik Sermersooq Tromsø Kommunelu sisamanngormat illoqarfittut ikinngutigiittut suleqatigiinnissamut isumaqatigiissummik atsioqatigiipput.
Borgmesteri Asii Chemnitz Narup aamma Tromsø-mi oqaaseqartartoq (ordfører) Kristen Røymo, ippassaq sisamanngornermi illoqarfittut ikinngutigiittut isumaqatigiissummik atsioqatigiipput, taamaalilluni kommunit taakku marluk immikkoortuni assigiinngitsuni, ilaatigut avatangiisimut, ilinniartitaanermut aamma illoqarfiup ineriartortinneqarnissaanut tunngassuteqartunik, suleqatigiinnissamut pisussaaffiliisumik atsioqatigiipput.
Kommuneqarfik Sermersuumi kommunalbestyrelsip ukioq kingulleq aalajangiuppaa Tromsø Kommune attavigineqassasoq.
”Tromsø-mi allanngoriartortitsineq, maanna uagut ingerlatarput, ingerlanneqareerpoq. Illoqarfik inuussutissarsiutitigut assut ineriartorpoq, inuusuttut ilinniagaqarluarsimasut Norgemeersut tamarmik nuuffigiumasarpaat. Misilittagaannit ilikkagaqarluarnissarput assut qilanaaraara.” Kommuneqarfik Sermersuumi borgmesteri Asii Chemnitz Narup oqarpoq.
Naak Tromsø Kommunemi innuttaasut Kommuneqarfik Sermersuummit pingasoriaammik amerlanerugaluartut misilittagaqarfiusimasut arlaqartut avitseqatigiissutigineqarsinnaapput.
”Norgemi suliffeqarfiit marluk maanna Nuummi immikkoortortanik pilersitsilersut; Hurtigruten aamma Kongsberg, aamma Tromsø-mi immikkoortortaqarput. Taamaattumik suliffeqarfiit taakku marluk illoqarfiup ineriartortinneranut assut sunniuteqarluarsimasut uppernarsillugu pitsaaqaaq.”, Asii Chemnitz Narup oqaluttuarpoq.
Tromsø-mut aamma Kalaallit Nunaanni kommunimik suleqateqarneq periarfissiilluarpoq.
“Sermeq aakkiartormat issittoq mianerisassaavoq, maanilu inuit ikittuinnaat najugaqarlutik. Issittumut soqutiginnittut arlaqaqaat. Suleqatigiinnikkut Bruxelles-imi Beijing-imiluunniit aalajangiisoqartillugu tusarneqarnissarsi qulakkeersinnaavarsi”, oqaaseqartartoq Kristin Røymo oqarpoq.
Maanna kommunit taakku marluk suleqatigiinnissamut pilersaarutit sukumiinerusut suliarissavaat. Tromsø-mit aallartitat upernaamut Nuummukassapput, tassanilu pilersaarutit eqqartorneqarlutillu aallartisarneqassapput.
Asii Chemnitz Narup aamma Tromsø-mit Kristin Røymo ulluni makkunani Arctic Circle Assembly-mi peqataanerminnut atatillugu Reykjavik-imiinnerminni suleqatigiinnissamut isumaqatigiissut atsiorpaat.