Nuussuarmut sullorsuup isumannaatsumik angallaffigineqaqqilernissaanut suli qaammatit pingasut utaqqissaagut.
Nuussuarmi Qinngutsinnilu biilinik angalasut angallateruttulernerup nalaani angalanerup suli sivisunerusumik kipiluttunartumik ingerlanissaa naatsorsuutigisariaqarpaat. Kommuneqarfik Sermersuumimmi nalilerneqarpoq, Nuussuup Nuullu akornanni sullorsuup isumannaatsumik angallaffigineqaqqilersinnaanera piffissami qaammatinik pingasunik sivisussusilimmik ungasitsigisumiittoq.
”Sullorsuup iigaata qaava salinneqassaaq. Taassuma kingorna nalilissavarput, angallattut ujaqqanut nakkaasunut isumannaarniarlugit suut aaqqiissutigisinnaanerlutigit. Suliarlu taanna sullorsuaq qeriunnaarpat aatsaat aallartissinnaavoq, tamannalu suliamut kinguarsaataavoq,” Frank Rasmussen, Kommuneqarfik Sermersuumi ingerlatsinermi pisortaq oqarpoq.
Qaammatini tulliuttuni pingasuni angallannerup oqinnerusumik ingerlasinnaaneranik Kommuneqarfik Sermersuumi Sanarfinermut Avatangiisinullu Ingerlatsivik, Nuup Bussii politiillu suleqatigalugit aaqqiissutissanik nassaarniarput. Sullorsuummi matuneraniit ulluni siullerni, angallatileruttornerup nalaani angallanneq annertuumik ilungersunartorsiortitsisoq tamanit malugineqarsimavoq.
”Pissutsit taamatut ingerlaannarsinnaanngillat. Taamaammat qaammatini tulliuttuni angallannerup qanoq ingerlanneqarsinnaaneranut aaqqiissutissanik ujartuivugut. Maannakkut biilinik angalasut ajornanngippat angallatileruttornerup avataani ingerlasarnissaannik siunnersorsinnaavagut,” kommunaldirektør Lars Møller-Sørensen oqarpoq.