– Utoqqaat holdetsinnut ilanngukkusullutik utaqqisarput, timimik sungiusaasoq Malene Plambek Bengtsen oqarpoq
Sapaatip-akunneranut marloriarluni utoqqarnut holdinik eqaarsaartitsisarpoq tamannalu utoqqarnik paaqqinniffimmi sammisassaqartitsivimmilu Ippiarsummi Nuummiittumi pisarpoq.
Pillorissaasoqatigiit Nuummi timikkut piginnaasakillisimasunut fitness neqeroorutigivaat, taakkua timimik sungiusaasumit ikiorneqarnissaq kissaatigippassuk. Imaassinnaavoq uppinnaveersaarnissaq ajornakusuulersimappat imaluunniit majuartarfitsigut ammukarneq qummukarnerlu ajornakusuulersimappat.
– Utoqqarnut nammineq eqaarsaarsinnaasunut sap. akunnerini 16-ini eqaarsaartitsisarpugut. Timip paarinissaa pingaaruteqaqaaq, pisariaqanngilarmi timip pisinnaasai annikillisissallugit. Maannakkut holdit ingerlasut naammassingajalerput tullissaallu aallartissapput, Malene Plambek Bengtsen oqarpoq.Birthe Hanfgarn (77), Marie Petersen (78) aamma Anthon Falksen (77) holdimi siulliupput eqaarsaaqatigiittarnerlu nuannarisupilussuullugu.
– Pitsaalluinnarpoq. Ilaanni sakkortusaqaaq, timimulli iluaqutaalluinnarluni. Eqaarsaarnerit assigiinngiiaartut tamaasa aqqusaarpavut, ilaatigut uppinnaveersaarnerit, eqqaamasinnaanermut sungiusarnerit eqaarsaarnermilu atortut assigiinngitsut atortarsimallugit.
– Sungiusarnerup saniatigut ataatsimooqatigiinneq nuannersuuvoq. Paaqqinniffimmi najugaqartuunngilagut, namminerisatsinnilli angerlarsimaffeqarluta. Taamaammat angerlarsimaffik qimalaarlugu allanik inussilaartarneq nuannertaqaaq, sungiusartartut taakku pingasut oqarput.