Aasat tamaasa Kalaallit Nunaata imartaa umiarsuarnik takornariartaatinik ulikkaartarpoq tamarmik takornarianik Kalaallit Nunaanni misigisassarsiorusuttunik kissaatilinnik ilaasullit.
Taamaakkaluartoq umiarsuit takornariartaatit Nuup umiarsualivianut tulakkaangamik kulturikkut annertuumik kalaallit ileqquinik arlalinnik pigisatsinnik takusassaqarpiartanngillat, soorlu qaannamik kinngusaqattaarneq, tivaneq uaajeernerlu takutissallugit periarfissaqartuaannanngilaq.
Tamakku Kommuneqarfik Sermersuup iliuuseqarfigerusuppai. Kulturi Aaqqissuussisarnermillu Immikkoortortaqarfik suliniummik aallarnisaavoq umiarsuit takornaríartaatit angisoorsuit Nuup umiarsualivianut tulakkaangata aliikkusersuisartussanik.
Tassani takornariat innuttaasullu Nuutoqqamukarlutik (Nuummi Kalersugaasivik) kalaallit kulturiat nammineq takullugulu misigisaqarfigisinnaassavaat.
Ileqqutoqqat malillugit takutitsisut kalaallillu maaniittut eqqumiitsuliortut naapinnissaannut periarfissinneqarlutik, avataaniit tikittunut kalaallit misigissusaat sakkortuumik qanimut misigineqarsinnaapput.
Nikki Lyberth Kommuneqarfik Sermersuumi aasaanerani sulisuuvoq taannaavorlu suliniummik suliarinnittoq. Oqaluttuarpoq taama takornariat tikittartut amerlatigisut illoqarfimmi uummaarissaarusunnermik pilersitserusunneq aammali sulerulooqqaarani suliarisassanik ujartuisimalluni.
Suliniut aatsaat aallarnisalerpoq taamaattumik ilanngutassaararpassuit tamarmik suli inissinneqanngillat.
”Sumiiffissaq tuniniaasussallu nassaarereerpakka taamaallaat aliikkusersuineq kisiat amigaatigaara, ajornakusoortilaarparalu. Aasaneranilu inuit aallagaassimaIlutik imaluunniit piffissaqaratik”.
Naak suliniut aporfissaqaraluartoq Nikkip aliikkutassat programmimiittut neriulluarluni oqaluttuaraa. Aggustip aallartilaarnerani suliniutip aallartinneqarnissaa ilimagaa.
Kalaallit sanalugaataat ileqqoq malillugu sanaat saniatigut marrianik qalipakkanillu eqqumiitsulianik pisinissaq periarfissaassaaq.
Maannamuugallartoq umiarsuarnik takornariartaatit angisoorsuit 1000-t sinnerlugit ilaasullit kisimik aliikkusersuisunut umiarsualivimmut tulassinnaapput. Tamanna pissuteqarpoq, umiarsuarnik takornariartaatinik mikinernik talittoqarsinnaalinnginnerani aliikkusersuinermik soqutiginninnerup paasineqarusunnera kissaataammat.
Aaqqissuussinerit 2-3 tiimit sivisussuseqassangatinneqarput.