Inatsiartut ombudsmandiata Nuummi Kommuneqarfik Sermersuup meeqqanut angerlarsiaffiutaa nakkutilliiartorluni pulaarpaa; Tupaarnaq, ajunngitsumillu paasisaqarfigalugu
”Meeqqat angerlarsimaffiat Tupaarnaq pitsaalluinnartutut isigaara najugaqartullu toqqissisimanartumik angerlarsimaffippalaartumik avatangiiseqarnissaat Tupaarnami aqutsisunit pingaartinneqartoq naliliiffigalugu, aamma najugaqartut eqqarsaatigalugit pissaaneq atorlugu iliuuseqartarneq sapinngisamik killilimmik iliuuseqarfigisarlugu”., Vera Leth oqarpoq.
Tupaarnaq Meeqqanut immikkoortortaa meeqqanut arfinilinnut, arfinilinniit 12-inut ukiulinnut inissaqarpoq, Inuusuttunullu immikkoortortaa inuusuttunut 12-iniit 18-inut ukiulinnut pingasunut inissaqarluni. Ombudsmandip pulaarnerani Tupaarnaq 9-nik najugaqartoqarpoq, 15-nillu sulisoqarluni.
Najugallit, ilaqutaasut sulisullu ataatsimut suleqatigiinnerat ombudsmandimit ajasoorutigineqartut ilagaat.
”Najugallit, sulisut ilaqutaasullu tamarmik meeqqaat angerlarsimaffiat pitsaasuinnarmik oqaatigisinnaavaat. Nakkutilliiartortut oqaloqatigisaat sulisut isumassuilluartutut, pimoorussilluartutut ilumoorfiginnilluartutullu isumaqarfiginarput. Init eqqiluitsuupput, kusanarlutik nuannerpasillutillu”, Vera Leth allappoq.
Ombudsmandip pulaarnera suliassaasa aalajangersimasut ilagivaat, oqartussaasut, meeqqeriviit suliffeqarfiillu nunap inatsisai naapertorlugit ingerlanersut qularnaarniarlugit.
Kommuneqarfik Sermersuup Meeqqanut Ilaqutariinnullu pisortaata, Martha Lund Olsenip ombudsmandip nersualaarinera nuannaarutigaa.
”Tupaarnami suliap ingerlanneqarnera tulluusimaarutigalugulu nuannaarutigisorujussuuara. Sulisut aqutsisullu meeqqat inissinneqarsimasut inuuneranni toqqammavissinniarlugit annertuumik iliuuseqarput”, Martha Lund Olsen oqarpoq.
Ombusmandip Tupaarnaq pillugu oqaaseqaataa tamaat atuarsinnaavat ombudsmandip nittartagaani