Majoriami misiliutigalugu suliniut Karen-Dorthe Josefsenip siunissami sulilernissaminut anguniagaqarneranut iluaqutaallunilu Majoriami ingerlaqqinnissaanut isumaqalersitsivoq.
Majoriaq innuttaasunut suli amerlanerusunut iluaqutaasinnaalersinniarlugu atuartitseriaaseq nutaaq misiliutigalugu suliniummut ilanngunneqarpoq. MA-1 tassaavoq paasiniaaffiusumik ingerlatsineq ukiut marluk tungaanut sivisussusilik, atuartullu piginnaasaannik periarfissaannillu paasiniaaffiusoq aamma taakku ineriartortinnissaannut ikiuunneq. Karen-Dorthep taama ingerlanneqartumik atuartinneqaruni iluaqutigissagaa Paamiuni Kommuneqarfik Sermersuup nalilerpaa. Taanna assassornermut pikkorippoq naammassisaqartarlunilu, ukiualunnili suliffissaqarsimanngilaq. Taanna oktobarimi aallartippoq.
Atuartut paasisaqartarnerat
MA-1-imi fagini arlalinni atuartitsiffiusartuni atuartut ulluinnarni isumagisassaniit inuttut ineriartornermut, IT-lerinermik aamma atuartitsinermut piareersarnermik ilinniartarput. Atuartut maanna pisinnaasaminnik aamma siunissami sulinissaminni sorusunnerminnik paasisaqarnissaat ukkatarineqartarpoq, taamaalilluni MA-2-mi atuartitsineq taakkununnga tigussaasumik siunertaqalissammat. Taamatuttaaq MA-mi kingusinnerusukkut atuarnermi unitsitsiinnartarneq annikillisinniarneqarpoq. Paasiniaaffiusumik ingerlatsinermi ilikkagaqarnissaq karakteereqalernissarlu anguniagaapput.
Karen-Dorthep toqqaannartumik nalinginnaasumik atuartitsinermi aallartigani periuseq nutaaq aqqusaaqqaaruniuk iluaqutigissagaa nalilerneqarpoq. Taassuma iluaqutigisinnaallugu nammineq takusinnaavaa. Taanna oktobarimi aallartippoq, allallu atuartut arfineq-marluk peqatigalugit Paamiuni MA-1-imik ingerlatsinermi atuartinneqartarluni.
Karen-Dorthe siunnerfeqalersoq
Karen-Dorthe atuarnermini nutaanik pikkoriffeqalerpoq aamma Majoriami ingerlaqqinnissamini siunnerfeqalerluni. MA-1-mi atuartut Paamiuni Majoriami ulloqeqqarnissamut marlunngornerit tamaasa igaffimmi ikiuuffissarisarpaat. Tamanna Karen-Dorthep assassornermik suliaqarusunneraniit igaffimmi sulerusulerneranik kinguneqarpoq.
”Akisussaaffeqarnarneruvoq, suliassaqartuaannarluni,” taanna oqarpoq.
Karen-Dorthe utoqqaat angerlarsimaffiata igaffiani suliffimmik misileeqqamerpoq. Atuarninilu naammassissallugu MA-2-mut ingerlaqqilluni danskisoornermik, matematikkimik aamma tuluttoornermik atuartinneqartalernissaminut qilanaarpoq, taamalu atuartinneqarneq meeqqat atuarfianni misilitsittarnertut karakteerilerneqarnermik naggaserneqassaaq.
”MA-1-imi atuarnerma kingorna karakteereqalernissara qilanaarinerulerpara. Siuariarnissannut piumassuseqarnerulerpunga,” taanna oqarpoq.
Karen-Dorthe aamma MA-1-imi atuartut allat arfineq-marluk peqatigalugit taamanikkussamut ilinniaqqinnissamut imaluunniit sulilernissamut piareersimassapput.
Innuttaasut suliffissarsiuussisarfimmut allaffitsigut innersuunneqarsinnaapput
Innuttaasut suliffeqanngitsut Majoriami taama ilinniartitseriaatsimut tulluarnerusut Kommuneqarfik Sermersuumi suliffissarsiuussisarfimmut allaffeqarfinnit ikiorneqarsinnaapput. Piareersarfiusumik ingerlatsineq kommunip Nuummi, Tasiilami Paamiunilu innuttaasunik piginnaanngorsaaqqiinissamik suliaqarneranut qitiulluinnalereersunut ilaavoq.
”Majoriamik pitsaanerulersitsivoq. Taama piareersarfiusumik ingerlatsilluni piginnaanngorsaaqqittarnertigut Majoriap neqeroorutigisai innuttaasunut amerlanernut tulluarnerulerput. Suliffissarsiuusisarfimmullu ingerlatsivinnik suleqateqarnikkut innuttaasut tassannga ilinniartitseriaatsimik nutaamik iluaquteqarsinnaasut takusinnaanerulerpagut,” suliffeqarnermut isumaginninnermullu sullissivimmi fagchefi, Bea Mølgaard Lennert oqarpoq.
Kommuneqarfik Sermersuumi Majoriami arlalitsigut nutarterineq atuartunut pitsaanerusumik atugassaqartitsilersoq siorna nalunaarusiap takutippaa.
Innuttaasut MA-mik ingerlatsineq pillugu soqutiginnittut najugarisaminni Majoriami ilitsersuunneqarsinnaapput. Majoriami aggustip qeqqani atualernissamut qinnuteqaatit kommunip illoqarfiini tamani aggustip arfineq-aappaata tungaanut tunniunneqarsinnaapput.
