Kommuneqarfik Sermersooq atortorissaarutinik sulinermilu atugassianik IT-kkut maajimi ajutoornermit sunnerneqarsimasunik attavilersuilluni suli sulivoq.
Sulinermut pingaarutillit arlallit maanna atorsinnaanngoqqinnerat nuannaarutigaarput. Kommunilu saaffiginnissuterpassuarnik sullissinermillu pisarnertut suliaqarsinnaanngoqqippoq.
Ullut tamarmik siuariarfiupput, sulili suliassaqarpoq. Taamaammat kommunimi atortorissaarutit tamarmik sapaatit-akunneri arlallit aatsaat qaangiuppata pisarnermissut ingerlalernissaat naatsorsuutigaarput.
Oqarasuaatit sapaatit-akunnerani uani ammaqqissapput
Nutaarsiassaq nuannersoq alla tassaavoq kommunimi oqarasuaatit uani sapaatit-akunnerani atorsinnaaleriartuaaqqinnissaat. Pisut killiffiat pillugu kommunip nittartagaani inoqatinullu attaveqaataani suli paasissutissiisassaagut.
Innuttaasunik Kiffartuussivik suli ammavoq
Innuttaasut saaffiginnittut kommunip suli ikiorsinnaavai.
Ikiorneqarusukkuit imaaliorsinnaavutit:
- Kommunimi innuttaasunut kiffartuussivinnut imaluunniit kommunip allaffiinut ornigunnikkut.
- Kommunimi oqarasuaatit normuinut uani sapaatit-akunnerani ammaqqinneqartunut sianerlutit imaluunniit mobilikkut oqarasuaatinut normuugallartunut attaveqarnikkut, taakku kommunip nittartagaani suli takuneqarsinnaapput.
- Kommunip nittartagaani inoqatinullu attaveqaataani nutaanik paasissutissiisarnitsinnut malinnaanikkut.
Innuttaasut pisariaqartitaannik ikorneqarnissaat kiffartuunneqarnissaallu qulakkeerniarlugu sulisugut ullut tamaasa ulapipput.
Naammagittarnissinnut qujanaq
Pisoq innuttaasorpassuarnut, suliffeqarfinnut aamma suleqatigisartakkatsinnut kipiluttunarnikooqisoq nalunngilarput. Taamaammat pisup aallartinneraniit naaneranut paasinnilluarnissinnut, tapersersuinissinnut aamma naammagittarnissinnut qutsavigaassi.
Kommunimi sulinerup pisarnermisut ileqqinnissaa anguniarlugu suleqqissaagut nutaanillu pisoqaraangat paasissutissiisassalluta.