Tallimanngormat 12-ianni Tasiilami holdi siunnersuinermi ikiortit nutaat 19-it najugarisaq qimannagu ilinniagaqarnertik naammassivaat. Ilinniartutut holdi Ilulissani Perorsaanermik Ilinniarfik aamma Tasiilami Kommuneqarfik Sermersooq akornanni suleqatigiinnikkut pilersinneqarpoq.
Suleqatigiinneq najukkami piginnaasaqalersitsivoq
Ilinniarfik Ilulissani qitiusumik inissisimavoq Perorsaanermik Ilinniarfiup aamma Tasiilami Kommuneqarfik Sermersuup akornanni suleqatigiinneratigut Tasiilami najugarisaq qimannagu holdimik ingerlatsineq iluatsissimavoq.
“Holdip takuteqqippaa, Tasiilami toqqammavilimmik ilinniarfeqarsinnaasoq – illoqarfimmullu pitsaasumik qaffasissusilimmik piginnaasanillu pisariaqartinneqartunik,” Tasiilami Meeqqanut Ilaqutariinnullu Ingerlatsivimmi fagschef Gerda Fleischer oqarpoq.
Siunnersuinermi ikiortit 19-it ilinniakkaminnik naammasseqqammersut isumaginninnikkut sulineq, siunnersuineq, innuttaasunik attaveqaqateqartarneq aamma sullissineq pillugu ilisimasaqalerput. Ilinniagaq isumaginninnikkut ajornartorsiutinik sulinissamut aamma ilaatigut meeqqanut ilaqutariinnullu suliassaqarfimmi, inunnut innarluutilinnut suliassaqarfimmi innuttaasunik imaluunniit innuttaasunik isumaginninnikkut ajornartorsiuteqartunik siunnersuinermik suliaqarnissamut piginnaasaqalersitsivoq. Holdi Perorsaanermik Ilinniarfimmit siunertamut ilinniartitsisussamit aallartitamit.
Ilinniakkamik tunngavissiineq angusaqarluarfigineqarpoq
Tasiilami najugarisaq qimannagu ilinniarfiit arlallit Kalaallit Nunaanni ilinniarfiit isumaqatigiissuteqarfigineratigut illoqarfimmi Tasiilami neqeroorutitut pilersinneqarsimapput ilaquttat attaveqaatillu qimannagit ilinniagaqarsinnaanermik periarfissiinissaq siunertaralugu. Holdip taassuma naammassinninnera ukiuni kingullerni Tunumi najukkami ilinniagaqarnissamut ineriartortitsinermi Kommuneqarfik Sermersuumit alloriarnertut pingaaruteqarluinnartutut isigineqarpoq.
”Ukiuni kingullerni tallimani maani inuiaqatigiinnut tunniussimasagut inerneri maanna takusinnaalerpagut. Tunumi innuttaasunut piginnaanngorsarnissaannut suli pitsanngoriartortumik neqeroorutitsialammik suliaqarsimavugut. Tamanna allanngueqataasimavoq, maanilu Nunatsinni sermersuup illuatungaani ilinniarnissamut neqeroorutit pillugit suleqatigiinnissamut isumaqatigiissutit iluanaarfiulluarsimasut ineriartorteqqinnissaannut qilanaarpugut,” Tunumi Nunap immikkoortuani pisortaq Hjørdis Viberg oqarpoq.
Siornatigut Tasiilami najugarisaq qimannagu ilinniagaqarneq pillugu suleqatigiinneq siornatigut psykoterapeutinik aamma perorsaanikkkut ikiortinik ilinniagaqarnermik naammassinniffiusimapput.
