Paamiuni takornarialerisunik workshopertitsineq 2026-mi maajip ulluisa 26-anni najukkami takornarialerisunit peqataaffigineqarluartoq ingerlanneqarpoq. Suliassaqarfimmi suleqatigiillualernissaq suliassaqarfimmilu takornarialerinerup siuarsaavigineqaqqinnissaanut toqqammavigissaarnerulernissaq workshopertitsinermi siunertaavoq.
Paamiuni takornarialerisunut ataatsimoorussamik attaveqaateqarluarnerulernissaq qulequttat pingaarnerit ilagaat. Umiatsiamik takornariartitsisartut takornarialerisullu allat akornanni suleqatigiilernissamut periarfissat kiisalu siunissami qulequttat, ataatsimiinnerit sammisassallu suut pingaaruteqartuusinnaasut peqataasut akornanni ilaatigut eqqartorneqarput.
”Paamiuni qaammatini kingullerni isumassarsiornartumik kajumissuseqalersitsisumillu ineriartorneq misigaarput. Toqqammavissaqarlualernissatsinnut workshopertitsineq alloriarnermi siulliuvoq. Peqataasut kajumissuseqarnerujussuat suliniuteqarusunnerujussuallu takullugu assut nuannerpoq, ilaatigullu suliassaqarfimmi tikitassatut siuarsaasussamik peqatigiilluta nutaanik isumassarsisarluta. Peqataasut tunniussaqarnerinut assigiinngitsuneersullu ataatsimoorluarnerannut qujavugut. Suleqatigiilluarnerup nangeqqinneqarnissaanut qilanaarpugut.” – taama oqarpoq Trine Mogensen, takornariaqarnikkut siunnersorti, Paamiut, Kommuneqarfik Sermersooq.
Workshopertitsinermi Visit Greenlandimiit Linda Kleist Kalaallit Nunaanni takornarialerinermi naleqassuseq takornarialerinerullu ineriartortinneqarnerani Visit Greenlandip suliarisartagai pillugit saqqummiivoq. Paamiuni Inuussutissarsiuteqarneq pillugu siunnersuisooqatigiit Dorthe-Marie M. Fontainimit saqqummiunneqarput.
Workshopertitsinerup kingorna kiffartuussineq takornariallu misigisaat qitiutillugit maajip ulluisa 13-ianni, 14-ianni aamma 15-ianni angallassisarneq pillugu pikkorissartitsisoqarpoq. Pikkorissartitsinerit Paamiut Tour Agency aamma Meaningful Travels Greenland akornanni suleqatigiinnikkut naammassineqarput.
2026-mi piginnaanngorsaataasunik arlalinnik sammisassaqartitsinerit ingerlanneqalereersimasut ilaatigut februaarimi internetikkut inuit naapittarfiitigut pikkorissarneq aamma Isumassarsiamiit piviusunngortitsinermut pikkorissarneq marsimi pisut Kommuneqarfik Sermersuumi Paamiuni Inuussutissarsiornermut immikkoortortamiit paasissutissiissutigineqarpoq. Ukiamuttaaq nutaamik pikkorissartitsisoqassasoq anguniarneqarpoq.