Assigiinngisitaarneq, ataqqinninneq aamma peqataatitsineq pillugit Kommuneqarfik Sermersooq suliaqarnerminut ilanngullugu Pride Monthimik qaammat juunimi malunnartitsivoq.
Malunnartitsineq ilaatigut pivoq kommunip illuisa eqqaanni neriusaamik erfalasulernikkut, kommunip Facebookimi ilisarnaataata neriusaap qalipaataanik tunuliaqutserneratigut aamma Nuummi Sipisaq Kangillermiittut qulliit neriusaap qalipaataanik qalipaasernerisigut.
Taakku suliniutit kommunimi assigiinngisitaarnermik aamma kommunimi tamani ataatsimoornernut peqataatitsinermut tapersersuinermut ukkataqarnermik ersersitsissapput. Kikkulluunniit namminiullutik ataqqineqarlutillu naapinneqarnissaminnut pisinnaatitaaffeqarnerat Kommuneqarfik Sermersuup tapersersugaraa. Taanna pisinnaatitaaffik illersorneqassaaq.
“Inuit tamarmik namminiusinnaanissaminnut aamma ataqqineqarlutik toqqissisimallutillu inuusinnaanissaannut malunnartitsinermut Pride Month pingaaruteqarpoq. Kommuneqarfik Sermersuumi inuiaqatigiit assigiinngisitaartuunerat nukittoqutaassasoq aamma kikkut tamarmik toqqissillutik namminiullutik inuiaqatigiinnut peqataasinnaanissaat kissaatigaarput,” borgmester Avaraaq Olsen oqarpoq.
Pridep malunnartinneqarnera kommunip naligiissitaanermut aamma peqataatitsinermut politikkianut Assigiinngisitaarnermik inissaqartitsineq-mik qulequtalimmut tulluarpoq, tassani inuit suiaassutsikkut kinaassuseqarnerat, kinguaassiutitigut piumassuseqarnerat, upperisaqarnerat, ukiui imaluunniit innarluuteqarneq pissutigalugit ilaatitsinnginnerup pinnginnissaa naqissuserneqarpoq. Assigiinngissuseq inuiaqatigiit pisuujunerunissaannut ataqatigiinnerunissaanullu tapertaasussatut isigineqassaaq.
Pride Month Nuummi arfininngorpat immikkut malunnartinniarlugu ingerlaaqatigiilluni paradertoqassaaq, tassanilu borgmesteri peqataassaaq oqalugiassallunilu.
🌈 Priderluarisi!
