Aasaq qallivoq, qularnanngitsumillu inuit amerlasuut Nuup Saava ornigarfigissavaat. Sumiiffik sapinngisamik biileqarfiussanngilaq — pisassaqarluni biilinik ornigunneq eqqaassanngikkaanni.
Sumiiffiup biileqarfiunnginnissaa Kommuneqarfik Sermersuumi kommunalbestyrelsip 2021-mi akuersissutiginikuuaat. Tamanna pivoq, sumiiffik illoqarfimmi innuttaasunit tikeraanillu kulturelerinermut tunngasunik atorneqarsinnaasarniassammat.
Malugiuk, allagartaliussaareersoq ”indkørsel forbudt” isumaqarmat, usingiagassaqarnermi usilersugassaqarnermilu kiisalu najugaqartunik biiliussinermi kisimi sumiiffimmut biilinik pulasoqarsinnaasoq. Neriuutigaarput, tamanna ataqqilaarumaarissi immissinnullu paaralusi aamma illoqarfiup ilaata oqaluttuassartaa eriagalugu.
Allagartaliussaq napparsimavitoqqap qanittuani napasoq sumiiffiup tungaanut pulasariamiittoq matuma siuliini pineqartut pillugit paasititsiniarneruvoq.