ArcticExpo 2026 Nuummi naammassilluarneqarpoq – angusallu naatsorsuutigisamit annertunerupput. Ulluni pingasuni ulapaarfiusuni saqqummersitsisut 50-it sinnerlugit amerlassusillit Kalaallit Nunaanniit, Savalimmiuniit, Islandimiit Danmarkimiillu peqataapput aalisarnermut, piniarnermut aammalu Issittumi nutaaliornermut tunngasunik saqqummiussaqarlutik.
Inussivik ulikkaarpoq umiatsianik, motorinik, teknologiinik kiisalu aalisariutinut piniarnermullu aalisarnermullu atortunik inuussutissarsiortunut aamma nammineq sunngiffimmi piniartartunut.
ArcticExpo-mi niuernikkut pitsaasorujussuarnik angusaqartoqarsimavoq, saqqummersitsisullu arlallit nalunaarutigaat tunisaqarluarsimallutik aammalu saqqummersitsineq tamakkerlugu annertuumik ingerlatsisoqarsimasoq. Peqatigisaanik saqqummersitsineq pulaartunit nalunaarsorneqarsimasunit 2.300-it sinnerlugit orninneqarsimavoq. Ulloq kingulleq aamma meeqqat atuarfiiniit atuartut amerlasuut peqataapput, inuussutissarsiummut qanillillutik misilittagaqarnissamut aammalu siunissami aalisarnermut piniarnermullu inuussutissarsiutini periarfissanik paasisaqarnissamut periarfissaqarlutik.
Oqalliffik ilisimasanillu avitseqatigiinneq
ArcticExpo aamma Kalaallit Nunaanni siunissami aalisarneq piniarnerlu pillugit oqalliffittut ilisimasanillu avitseqatigiiffittut toqqavittut inissippoq. Oqallinnermi peqataapput Aalisarnermut, Piniarnermut, Nunalerinermut Imminullu Pilersornermut Naalakkersuisoq Peter Borg, kommunalpolitikerit, inuussutissarsiortut aammalu aalisarnermut piniarnermullu kattuffiit, inuussutissarsiutip ineriartornera, piujuartitsineq aammalu avammut niuernermi periarfissat pillugit oqaloqatigiinnerni.
Saqqummiisuni ilaatigut immikkut sammineqarpoq Nuummiit aalisakkanik nutaanik avammut tuniniaaneq, mittarfeqarfiup nutaap periarfissiineratigut siuariartornissamut niuernermullu nunani tamalaani sukkasuumik periarfissaqalersitsineq.
ArcticExpo Nuummi nukittorsaaqataavoq
ArcticExpo pilersinneqarmat anguniagaavoq Kalaallit Nunaanni Issittumilu aalisarnermut piniarnermullu inuussutissarsiutillit ataatsimoorfiannik nutaamik pilersitsinissaq. Tamanna aallartilluareerpoq pitsaasumillu angusaqarfiulluni.
– Piniarneq aalisarnerlu kommunitsinni inuussutissarsiutinut pingaarnernut ilaapput. Taamaattumik nuannaarutigaara ArcticExpo kivitseqataasinnaammat inuussutissarsiutip ineriartortinneqarnissaanut aammalu najukkamiit nunanilu tamalaaniit peqataasut naapiffissaannik pilersitsilluta, borgmesteri Avaaraq Olsen saqqummersitsinerup ingerlanneqaqqaarnerani oqarpoq ingerlaqqillunilu:
– Nuuk Kalaallit Nunaanni aalisarnermut, angallannermut niuernermullu qitiusumik inissisimareerpoq, ArcticExpolu aqqutigalugu illoqarfiup Issittumi aalisarnermut piniarnermullu tunngatillugu nutaaliornermi ineriartortitsinermilu qitiunerata nukittorsarneqarneranut peqataavoq.
Suleqatigiinnermut qujanaq
Kommuneqarfik Sermersooqip AKKC suleqatigiinnermut nukittuumut piginnaasaqarluartumillu ArcticExpo-p pilersinneqarnerani peqataasimanerannut qutsavigerusuppai. AKKC-p nunani tamalaani aalisarnermut inuussutissarsiornermullu saqqummersitsinerit angisuut aaqqissuunnerini misilittagai Nuummi saqqummersitsinerup nutaap pitsaasumik aallartinnissaanut pingaarutilimmik iluaqutaasimapput.
ArcticExpo tulleq Nuummi 2027-imi ingerlanneqartussaq qilanaarilereerparput. Nalilersuineq aaqqissuussaanissamillu siunissami qanoq ingerlanneqassanersoq maanna ingerlaleruttorpoq, kiisalu tullissaanut ulluliinissami suffisarnerup nalaata eqqarsaatigineqarnissaa ilanngunneqassaaq.
Qujanaq saqqummersitsisunut tamanut, suleqatigisanut, pulaartunut, kajumissutsimik suleqataasunut inuusuttunullu peqataasunut ArcticExpo 2026 iluatsilluartumik ingerlanneqarnissaanut peqataasimasunut.