Avaaraq Olsen sulinngiffeqareerluni sulileqqippoq, Kommuneqarfik Sermersuumilu kommunalbestyrelsep sapaatip-akunnerani sammisaqarnissaa aallarnisarlugu.
Finlandimut paasisassarsiorluni angalanissaq pilersaarutaasimagaluartoq angalaffiginagu, kommunalbestyrelsemi ilaasortat Nuummi ataatsimoorput, tassani sammisat kommunip ineriartornissaanut qitiusut arlallit sukumiisumik suliarissavaat.
Sapaatip-akunnera sammisaqarfiusussaq ilaatigut ukunannga ukkataqarfiussaaq:
- Atuarfeqarneq
- Imermut minguttumut pilersaarusiaq
- Eqqagassalerineq
Sapaatip-akunnerani sammisaqarfiusussami siunertaavoq itisiliinissamut periarfissiinissaq aamma kommunalbestyrelsemi tamani ataatsimut oqallisiginnissinnaanissaq – pingaartumik missingersuutinut isumaqatigiissummi aalajangiunneqarsimasumi pingaarnersiuinerit pillugit.
– Uagutsinnut pingaartuuvoq suliassaqarfiit annertuut ajornakusoorsinnaasullu innuttaasunut ulluinnarni sunniuteqartut sukumiisumik suliaqarfiginissaannut piffissaqarnissaq. Sapaatip-akunnerani sammisaqarfiusussami kommunalbestyrelsep ataatsimoortinnissaanut periarfissaqalerpugut aamma ataatsimut oqaloqatigiinneq siunnerfeqarnerlu qulakkeerlugu, borgmester Avaaraq Olsen oqarpoq.
Sapaatip-akunnerata ingerlanerani sammisat annerit pingasut immikkut ukkatarineqassapput, siammasissumillu suleqatigiinnissaq pisariaqarpoq aamma siuariarnissaq qulakkeerniarlugu ataatsimut anguniagaqarfiussallutik.
Ikuallaavimmut pulaarneq eqqagassalerinerlu
Kommunalbestyrelsep ikuallaavimmut pulaarnissaa pilersaarutinut ilaavoq, tassani eqqagassalerinermik imermillu minguttumik suliaqarneq, atoqqiineq paasisaqarfigissavaat aamma susassaqarfimmi siunissami aaqqiissutissanik ineriartortitsineq.
Kommunimi eqqagassalerinermut, imermut minguttumut piujuartitsinermullu attuumassuteqartut pillugit unammillernartut periarfissallu pulaarnermi paasisaqarfigineqassapput.
Arctic Expo 2026-mi peqataaneq
Sapaatip-akunnerani sammisaqarfiusussamittaaq Arctic Expo 2026-mut peqataaffiussaaq, kommunalbestyrelselu aalisarneq piniarnerlu pillugit oqallinnernut peqataassalluni.
Politikerillu inuussutissarsiornermik ineriartortitsineq aamma nunatsinnut sunniutai pillugit kalaallinik inuussutissarsiornermik sulialinnik oqaloqateqarnissaminnut periarfissaqassapput.
Itisilerinissamut periarfissaqarneq ataatsimullu anguniagaqarneq
Sapaatip-akunneri sammisaqarfiusut kommunalbestyrelsemut pingaaruteqartunut ilaapput. Taamaaliornerni sammisat ajornakusoortut suliarinissaat periarfissaqarfigineqarnerusarpoq aamma ataatsimut aaqqiissutissarsiorluni kommunimi tigussaasumik iliuuserisatut suliarineqarsinnaallutik.
Borgmesterip sulileqqinnerani aamma kommunalbestyrelsep Nuummi ataatsimoornerani sapaatip-akunnera suleqatigiinnissamik, pingaarnersiuinermik Kommuneqarfik Sermersuumilu ineriartortitsinermik innuttaasunut iluaqutaasussamik ukkataqarfiussaaq.