Sanarfinermut Avatangiisinullu Ingerlatsivik Paamiuni tamanit atorneqarsinnaasumik nakkutilliinermi qinngutinut atorneqartussamik ikkussivissamik nunaminertamut atuinissamik qinnuteqaammik tigusaqarsimavoq.
Qinngut silami ikkunneqartussatut naatsorsuussaavoq aalaakkaasumik ikkunneqarluni innuttaasut tikeraallu pinngortitamik taassumalu ungasinnerusuani isiginnaarsinnaanissaannik periarfissiissalluni. Silap pissusaanut akiuussinnaavoq ukiorlu naallugu atorneqarsinnaasussatut tulluarluni, saviminermik aalaakkaasumik toqqaveqarluni ataatsimut 1,54 meterit missaannik portutigissalluni 48 kiilullu missaannik oqimaatsigissalluni.
Immikkoortoq Kommunimut pilersaarummut tapiliussamut 20D8 – Paamiut eqqaani nunaminertaq sanaartorfigeqqusaanngitsoq naapertorlugu ilaavoq.
Qinnuteqaat pillugu oqaaseqaatissaqaruit akerliliissutissaqaruilluunniit Sanarfinermut Avatangiisinullu Ingerlatsivimmut nassiussinnaavatit, kingusinnerpaamik ulloq 26. maj 2026.
Tusarniummut akissuteqaat ima nalunaaqutserneqassaaq BOG-2020-11112-499.
Oqaaseqaatit uunga nassiunneqassapput:
Kommuneqarfik Sermersooq
Sanarfinermut Avatangiisinullu Ingerlatsivik
Sanaartornermut Immikkoortortaqarfik
Postboks 1005, 3900 Nuuk
