2025-mi Kommuneqarfik Sermersuumi meeqqat inuusuttullu ukiut tallimat siulianiit amerlanerungaatsiartut paaqqutarineqarnermiit ilaquttaminnut angerlarput. Tamanna kommunimit suliassaqarfimmi kisitsisit pingaarnerit pillugit nalunaarusiami allassimavoq.
Ilaqutariit nukittunerusut sullissinerlu pitsaanerusoq
2025-mi suliani 92-ni meeraq imaluunniit inuusuttoq ilaquttaminut angerlartinneqarsinnaasoq nalilerneqarpoq. Tamanna ukiut siuliini tallimani ukiumut angerlartitsinerit agguaqatigiisillugit 66-iusunut sanilliunneqarsinnaavoq. Angerlartitsinerit ataasiakkaanik suliatigut naliliinernik tunngaveqartuaannarput, tassani meeqqap pisariaqartitsinera isumannaatsumiinnissaalu pingaarnertut eqqarsaatigineqartarput.
Allanngoriartorneq pitsaasoq ilaqutariinnik nukittunerulersitsinissamut annertuumik suliniuteqarnerup aamma sullissinermi aaqqissuussaasumik suliniuteqarnerup kinguneraa. Isumaginninnikkut perorsaanikkullu mentorit ilaqutariinnullu aqqutissiuussisartut angerlartitsineq sioqqullugu kingornalu ilaqutariinnit toqqissisimasunik sinaakkuteqartinneqarnissaannut ikiuupput. Peqatigitillugu sullissinermi pitsaanerusunik periuseqalernermi meeqqat toqqissisimasumik angerlartinneqarnissaannut ilaqutariit pillugit uppernarsaatit sullissisunit pisariaqartinneqartut pigineqalerput. Tamanna suliani angerlarsimaffiup avataanut inissiinernut tunngasuni suliatigut ilisimasalinnit arlalinnit tapersiinernik aamma suliani inissiinernut tunngasunik tamanik aqutsisunit nakkutilliinernik kiisalu angerlartitsinnginnermi angerlartitsereernermilu suliamut tunngasumik suli
ilisimasalimmit ilaqutariinnik nakkutilliinernik aamma ikorfartuinernik imaqarpoq.
Meeqqat amerlanerusut toqqissisimasumiittut
Kommune tamakkerlugu 0-24-nik ukiullit inissinneqarsimasut ikileriaateqarput massakkullu 2021-miilli aatsaat taama ikitsigalutik. 2024-mut sanilliullugu 2025-mi decembarimi kommunimi meeqqat inuusuttullu inissinneqartut 58-inik ikinnerupput. Ukiup ataatsip ingerlanerani 387-iniit 329-nut ikileriarneruvoq. Ataatsimut isigalugu paasinarsivoq, meeqqat amerliartortut namminneq ilaquttaminni toqqissillutik peroriartorsinnaasut.
“Takusinnaavarput ataatsimoorluta suliniuteqarnerput iluaqutaasoq. Aaqqissuussaasumik sullissinerup aammalu ilaqutariinnik qanimut suleqateqarnerup tamanna inernerivaa. Ineriartorneq tulluusimaarutigeqaarput – naatsorsuutigaarpullu sulineq annertunerusumik kaammattuutaajumaartoq,” Meeqqanut, Ilaqutariinnut Atuartitaanermullu Ataatsimiititami siulittaasoq, Poul Petersen oqarpoq.
Meeqqat inuusuttullu angerlarsimaffiup avataanut inissinneqarsimasut ikileriarnerat kommunimi kisitsisini tamakkiisuni takuneqarsinnaavoq, pingaartumilli Tasiilamut tunngasut immikkuullarissuupput. Tassani meeqqat inuusuttullu angerlarsimaffiup avataanut inissinneqarsimasut 2025-imi 128-iniit 97-inut ikileriarsimapput. Tamanna nalunaarusiami kisitsisini appasinnerpaavoq, tassaniimmata kisitsisit kingumut 2018-imoortut, aammalu ilaqutariinnik nukittunerusumik suliniuteqarnermik takussutissiisut.
Siunissami annertunerusumik pitsaaliuinissaq
Kommuneqarfik Sermersooq ukiuni aggersuni ilaqutariinnut immikkut pisariaqartitsisunut annertunerusumik pitsaaliuinermik sulineq attatiinnarniarneqarlunilu nukittorsarniarneqarpoq. 2026-imi Meeqqanut Ilaqutariinnullu Ingerlatsivimmi missingersuutinut siunnersuutinik ineriartortitsineq saqqummiussisarnerlu immikkut ukkatarineqassapput, ilaqutariit qanimut suliniuteqarfigineranni siusissukkut suliniuteqarnermut iluaqutaasussamik, taamaalillutik unammilligassat siusinnerusukkut suliarineqartalissammata pingaartumik ilaqutariit namminneq angerlarsimaffiini sungiusimasaanni. Peqatigitillugu ingerlatsivimmi ataatsimut aningaasaqarnerup pilersaarusiorluakkamik kittaartumik allanngortiteriffiginissaa sulissutigineqarpoq, taamaalilluni aningaasat amerlanerusut siunissami siusissukkut suliniutinut pitsaaliuinermullu atorneqarniassammata. Anguniarneqartoq tassaavoq meeqqanut inuusuttunullu attanneqarsinnaasunik aaqqiissuteqarnissaq – amerlanerit angajoqqaaminni inuulluataarsinnaaqqullugit aammalu sapinngisamik piaartumik suliniuteqarfigisinnaaqqullugit.