Tamanut tusarniut: Nuummi C.E. Jensensvejip qaavani sisuffissiamik inissiinissamik qinnuteqaat.

Sanarfinermut Avatangiisinullu Ingerlatsivik sisuffissiamik 350 meterit missaanik takissusilimmik C.E. Jensensvejip qaavanit aallartittumit inissiinissamut qinnuteqaammik tigusaqarsimavoq.

Ilanngullugit qinnutigineqarput aallartarfissamik apuuttarfissamillu pilersitsinissaq kiisalu containerimik 20 fods-imik ingerlatsinermi atortunillu toqqorsivittut atorneqartartussamik inissiinissaq. Aallartarfissaq salliarnartatut 5 x 5 meterinik angissuseqarluni sananeqassaaq, tamatumalu saniatigut salliarnartamik 10 x 10 meterinik angissusilimmik utaqqisarfittut/siuleriiaartarfittut nasittarfittullu atorneqartussamik sanasoqassaaq. Apuuttarfissaq salliarnartatut  5 x 5 meterinik angissusilik sananeqassaaq.

Aallartarfissami apuuttarfissamilu sukanik inissiisoqassaaq sisusarfiup nunamit 20-25 meterinik portussuseqarnissaa qulakkeerniarlugu, taamaasiornikkullu Nuummi innuttaasut ajoqusersorneqaratik isumannaatsumillu sisoortarnissaat qulakkeerniarlugu.

Biilit unittarfiata eqqaani containerimik 20 fodsimik angissusilimmik inissiisoqassaaq, taanna  saqqummiinerni, ilitsersuinerni, atuisussallu isumannaallisaatissanik atortulerneqartarnissaanut atorneqartassaaq.

Pilersinniakkami qaqqaq allanngortinneqarnavianngilaq. Imeqarfimmut killigititaq ataqqineqassaaq, killilersuutillu malinneqarnissaat qulakkeerniarlugu erseqqissunik allagartalersuisoqassalluni.

Pilersaarusiortarneq nunaminertamillu atuineq pillugit Inatsisartut inatsisaat nr. 4, 25. januaari 2024-meersoq aamma Kommunimut pilersaarut 2036 pillugit Namminersorlutik Oqartussat inatsimmik nalunaarutaat qinnuteqarnermi pilersaarummut tunngaviuvoq.

Qinnuteqaat pillugu oqaaseqaatissaqaruit akerliliissutissaqaruilluunniit Sanarfinermut Avatangiisinullu Ingerlatsivimmut nassiussinnaavatit, kingusinnerpaamik ulloq 3. maj 2026. 

Tusarniummut akissuteqaat ima nalunaaqutserneqassaaq BOG-2022-00748-010.

Oqaaseqaatit uunga nassiunneqassapput:

Malugiuk: Ingerlatsivimmiit erseqqissaatigineqassaaq suliniut taamatut ittoq piffimmi allami ingerlanneqartussatut tusarniutigineqarnikuummat, iluatsinngitsumilli.   

---