Sanarfinermut Avatangiisinullu Ingerlatsivik Nuummi sissaq sinerlugu aqqummik, immikkoortup aappaannik, pilersitsinissamik nunaminertamik qinnuteqaammik tigusaqarpoq.
Saqqarliit aamma Biologstationi akornanni sissaq sinerlugu aqqut 525 meter missaanik takitigisoq kiisalu Noorliit illutaata kujalliup eqqaani biilinik unittarfiup tungaanut aqquteeraq fliselersugaq sananeqarnissai qinnutigineqarput.
Aqqut 2,1 meterit missaanik silissuseqassaaq portussusaalu nunamit annerpaamik 0,5 meterit missaanik portussuseqassalluni. Aqqut atuarlugu uninngaartarfissanik katillugit arfineq pingasunik sanasoqassaaq siunissamilu issiaartarfissanik aamma paasissutissiisarfinnik assigiinngitsunik pilersitsisoqassalluni.
Aqqutip ilusilersornera sapinngisamik kikkunnit tamanit atorneqarsinnaasussanngorlugu anguniarneqarpoq. Tamanna tummeqqat, majuarissat, qasuersertarfiit kiisalu najoqqutassanik titarnernik nalunaaqutsikkanik pilersitsinikkut anguniarneqassalluni.
Aqqut qisummit sananeqassaaq aqquteerarlu fliselersorneqassalluni angissutsinik 60 x 60 cm, 30 x 30 cm aamma 15 x 30 cm. Toqqaviit immikkoortukkaat sananeqassapput 1,8 meterinik akuttutigisunik inissillugit.
Qinnuteqaat Kommunimut pilersaarut 2036 naapertorlugu suliaavoq. Immikkoortoq kommunimut pilersaarummut tapiliussami uani ilaatinneqarpoq 1D3 – Nuup kujammut sineriaa Saqqarliillu. Immikkoortup sukisaarsarnermut siunertanut, soorlu pinngortitamut kulturikkullu oqaluttuarisaanernut aalajangerneqarpoq.
Paasissutissat allat Kommunimut Pilersaarut 2036-mi takuuk: https://kp.sermersooq.gl/iluseq-pingaarneq-qitiutinneqartullu/nuup-geografii/sukisaarsaartarfimmik-aaqqissuussineq/suliniuteqarfiit-sukisaarsaarfiit/
Qinnuteqaammut oqaaseqaatissaqaruit akerliliissutissaqaruilluunniit, taakkua Sanarfinermut Avatangiisinullu Ingerlatsivimmut kingusinnerpaamik ulloq 24. april 2026-mi nassiunneqassapput.
Tusarniaanermut akissutit BOG-2020-11112-435-mik nalunaaqutseqquneqarput.
Oqaaseqaatit uunga nassiunneqassapput:
Kommuneqarfik Sermersooq
Sanarfinermut Avatangiisinullu Ingerlatsivik
Nunaminertanut Sanaartornermullu Oqartussaqarfik
Postboks 1005, 3900 Nuuk
