Mountain Leader Trainingimik ukiuunerani ilinniartitsinermik ingerlatsineq siulleq Tasiilap nunataani marsimi ingerlanneqarpoq. Suliniut najukkami inuusuttut takornarianik ulluni arlalinni sumiiffimmi takornariartitsinermi piginnaasaannik pitsanngorsaanissamut suliniuteqarnermut ilaavoq.
Tasiilamit inuusuttut sisamat ulluni qulini ingerlataqarnermi peqataapput, tassani ukiuunerani qaqqakkut isumannaatsumik ingerlaarnissamik, ingerlaarnermi aqutsinermik aamma issittumi ukiuunerani pinngortitamiinnermik ilitsersuunneqarput. Sungiusarneq Tasiilap qaqqaani qaqqaasalu akornanni ingerlanneqarpoq timikkullu sapiissuseqarnissamut aamma suleqatigiinnissamut piumasaqaateqarfiungaatsiarpoq.
Takornariaqarnermi najukkami piginnaasanik pitsanngorsaaneq
Ingerlataqarneq suliniummut Mountain Leaderimut ilaavoq, tassani Tunumi pinngortitami takornariartitsinerup iluani najukkami piginnaasanik pitsanngorsaanissaq siunertaavoq. Issittumi misigisassarsiornermut soqutiginnikkaluttuinnarneq najukkami takornariartitsisartunik pinngortitami, isumannaallisaanermi kulturimilu misilittagalinnik piumasaqaateqarfiunerulerpoq.
Suliniummi Skotlandimit suliffeqarfimmit The Polar Academymit ilitsersuisartut qanimut suleqatigineqarput, taanna peqataasunut nunarsuaq tamakkerlugu annertuunik piumasaqaateqarpoq. Peqataasut pikkorissarnermik naammassinnittut pikkorissarsimanermut uppernarsaatinnassapput, suliassaqarfimmi nunarsuaq tamakkerlugu piumasaqaataasunik naammassinnittumik.
Sungiusarnermi piginnaasanik ineriartortitsisoqarpoq, soorlu kalitalerluni backcountry-ski, ukiuunerani isumannaallisaanermik naliliineq, isserujussuarnerani suliaqarneq, isumannaatsunik ukiuunerani tammaarfiliorneq kiisalu ulluni arlalinni angalanermik tupermi unnuinertalinnik pilersaarusiorneq. Taakkua saniatigut kulturikkut tunuliaqutinik ingerlatitseqqiineq ilaatitsinerlu pingaartinneqarpoq, taamaalillutik peqataasut takornariartitsisutut atuuffimminni najukkami kinaassutsiminnik ilaatitsisinnaaniassammata.
Nunanik tamalaanik suleqateqarneq
Igdlo (Tasiilami kommunip inuusuttut kulturikkut illua), suliniut ‘Tasiilami Suleqatigiippugut’, Sustanable Now Greenland, najukkami takornariartitsisartut aamma The Polar Academy suleqatigalugit Mountain Leader Training ingerlanneqarpoq.
Suliniut Kommuneqarfik Sermersuumit tapiiffigineqarpoq. Tunumi nunap immikkoortuani pisortamit Hjørdis Vibergimit ukiuunerani sungiusarnerup pingaaruteqassusaa naqissuserneqarpoq.
“Inuusuttunut aningaasaliinissaq aamma takornariaqarnermik ineriartortitseqataanissamut periarfissinnissaat pingaaruteqarpoq . Ingerlataqarneq inuttut ataasiakkaatut piginnaasaannik aamma nunap immikkoortuani ineriartornissamut ilippanaatinik pitsanngorsaataavoq,” nunap immikkoortuani pisortaq oqarpoq.
Ukiuunerani ilinniartitsineq ukiup qanoq ilineranut sivitsuinerinnaanngilaq kisianni aamma Tunumi takornariaqarnerup ineriartornerani najukkameersunik peqataatitsinerunissamut periusissiugaasumik alloriarneruvoq.
Tasiilamit inuusuttut sisamat peqataapput sisamaallutillu ingerlataqarnermi angusillutik.
Suliniut tapiiffigineqarnissamik pisariaqartitsiffiuvoq aamma siunissami. Maannamut suliniut Kommuneqarfik Sermersuumit, Det Nissenske Familie Fondimit, Kreamers Grønlandsfondimit, Sustainable Nowimit aamma PH-Outdoorimit aningaasaliiffigineqarpoq, tamatumalu sungiusaanerup atortunik eqqortunik atortoqarluni attaveqaasersuuteqarlunilu naammassinninnissaq periarfissaalersippaa.
