Tina Evaldsen Meeqqanut Atuarfeqarnermullu Ingerlatsivimmut pisortassatut Kommuneqarfik Sermersuumi atorfinitsinneqarpoq. Atorfinitsitsineq qinnuteqartut piukkunnartorpassuit akornanni toqqaasoqareernerani pivoq, atorfinitsitsinnissamut ataatsimiititaliami ilaasortat tamarmiusut Tina Evaldsen atorfimmut piukkunnartutut nalileereernerisigut.
Atorfinitsinneqarneratigut misilittagalimmik allannguerusussuseqartumillu kommune pisortartaarpoq, isumaginninnermut peqqissutsimullu tunngasuni aqutsinermik misilittagaqarluartoq.
Tina Evaldsen Isumaginninnermut aqutsisoqarfimmi pisortatut atorfeqaqqammerpoq, Paarisamilu immikkoortortami aqutsisutut atorfeqarnikuulluni. Tassani peqqissutsimut pitsaaliuinermullu tunngasunik anguniagalimmik suliaqartarsimavoq, suliassaqarfiillu assigiinngitsut akornanni suleqatigiinnermik misilittagaqarluarsimalluni.
“Tina Evaldsen sulinermini aqutsinermik, suleqatigiinnermik ineriartortitsinermillu suliaqarnikkut pikkorissuseqarluarnini takutittarsimavaa. Atugarissaarnerup, pitsaaliuinerup aamma meeqqanik ineriartortitsinerup imminnut ataqatigiinnerat pillugu pingaarutilimmik paasisimasaqassuseqarpoq, aamma meerartatta inuusuttortattalu suliniuteqarfigineqarnerini misilittagaanik atorluaanissaq qilanaaraarput,” kommunaldirektør Ole Jakobsen oqarpoq.
Tina Evaldsen atorfittaamini aallartinnissaminut aamma kommunitsinni meeqqanut atuarfeqarnermullu tunngasunik suliaqalernissaminut qilanaarpoq: “Kommuneqarfik Sermersuumiilernissannut aamma meeqqanut atuarfeqarnermullu tunngasunik suliaqalernissannut qilanaarpunga. Suliassaqarfik siunissaq eqqarsaatigalugu annertuumik pingaaruteqarpoq, aqutsisut, suleqataasut suleqatigisartakkallu qanimut suleqatigalugit inerisaanermi sunniuteqaqataanissannut qilanaarpunga.”
Tina Evaldsen 49-nik ukioqarpoq aamma Nuup Kommuniani sulinermik misilittagaqarluni, kommunip iluani atorfimmili allami sulileqqinnissaminut qilanaarpoq. Pisortartaaq 2026-mi maajip aallaqqaataani atorfinissaaq.
