Najukkami suliaqartartut amerlanerusut, suleqatigiinnerit nutaat umiarsuaqartarnerullu annertusiartornera takornariaqarnermik pitsaanerulersitsissapput, ukiumut 30.000-ngajannik tikeraartoqartalerluni.
Paamiuni takornariaqarneq ukiuni kingullerni arfineq pingasuni annertuumik pitsaasumik ineriartorpoq 2025-milu umiarsuarmik takornariartaammik takornariaqarnikkut 29.873-inik tikeraartoqarnikkut Paamiut sinerissami tikeraartut amerlassusaat malillugit pingajuattut inissisimavoq.
Tikeraartut amerleriarneri malillugit takornariaqarnermut soqutiginninneq annertuseriangaatsiarpoq. Taamaattumik Paamiuni takornarialerisut takornariaqarnermik inuussutissarsiornermillu ineriartortitsinermi peqataalluarsimapput. Ineriartortitsineq najukkami suliaqartartut Kommuneqarfik Sermersuullu akornanni qanimut suleqatigiinnikkut pivoq. Visit Paamiut, kommunimi Inuussutissarsiornermut Immikkoortortaanut ilaasoq takornariaqarnermik inuussutissarsiornermik pilersitsinermut tapersersuinermi pingaarutilittut atuuffeqarpoq, ilaatigut siunnersuinikkut, piginnaasanik ineriartortitsinikkut aamma najukkami aallarnisaasunik ingerlataqartitsinikkut.
Ullumikkut Paamiuni angallassisartut sisamaapput – NAJANI Boat Charter, Arctic Nanu Tours, Nanoq Boat Tours aamma Paamiut Boat Tours. Tamatuma saniatigut nunami takornariaqarnermik suliaqartumik pilersitsisoqarpoq, RuPo, tassunga ilanngullugu Paamiut Tour Agency. Ataatsimut isigalugu tamanna tikeraanut misigisassanik siammasinnerusunik assigiinnginnerusunillu neqerooruteqarnissamut iluaqutaavoq. Taakkunani suliaqartuni arlallit kommunip PAX 12 isumannaallisaanermut akuersissutinut pikkorissaanerinut peqataanikuupput tamanna isumannaallisaanermut pitsaassutsimullu iluaqutaassaaq aamma najukkami inuussutissarsiutip suliatigut ilisimasaqarfiunissaanut iluaqutaassalluni.
“Ukiuni arlalinni Paamiuni takornariaqarnerup qanoq ineriartorsimanera takullugu pitsaasorujussuuvoq. Najukkami annertuumik tunniusimasoqarpoq aamma takusinnaavarput suliffeqarfiit kommunillu akornanni suleqatigiinneq aalajangersimasunik angusaqarfiusoq,” Borgmester Avaaraq Olsen, Aningaasaqarnermut Inuussutissarsiornermullu Ataatsimiititami siulittaasuusoq oqarpoq.
Takornariaqarnerup annertusiartornera umiarsuarnik takornariartitsisarnerup annertusiartorneranut attuumassuteqarpoq. Peqatigitillugu tulattarnerit amerlasuut illoqarfimmut sivikitsumik tikeraarnernut tulluartunik nioqqutissanik misigisassanillu nutaanik ineriartortitsinissamut tunngavisseeqataapput. Ilaatigut nunami takornariaqarnermut tunngasuni suliniutinik aallartitsisoqarpoq, tassani najukkami aallarnisaasunit arnat peqatigiiffiata illuutigisimasaani takornariaqarnermut allaffimmik pilersitsinissaq suliarineqarpoq. Tassani pilersaarutaavoq, najukkami kulturimik paasissutissiisarnermut takornariaqarnermillu suliaqarnermut ataatsimoorfimmik pilersitsinissaq.
Ineriartortitsinerup peqatigisaanik kulturikkut kingornutassat najukkamilu nukissat pioreersut nioqqutissani nutaani ilaatinneqarnissaat sulissutigineqarpoq, tassunga ilanngullugit kalaallisuunik atuineq, najukkami nioqqutissanik tuniniaaneq aamma neqeroorutit amerlineqarnissaat pillugu allanik suliaqartunik suleqateqarneq. Misigisassanik ineriartortitsinissaq aamma ukkatarineqarpoq, tassani tikeraat najukkami kulturimik paasisaqarsinnaapput ilaatigut takornariartitsisoqarluni sammisassaqartitsinikkut aaqqissuussaqartitsinikkullu.
Peqatigitillugu Paamiuni suliffeqarfik allaanerusoq nutaaq pilersinneqarpoq. Takornarialerinermut allaffeqarfik tassani pineqarpoq, taanna pilersaarusiorneqaleruttorpoq ukiullu ingerlanerani pilersinneqarnissaa naatsorsuutigineqarluni. Tassani siunertaq tassaavoq, najukkami suliaqartut assigiinngitsut akornanni ataatsimoortitsinissaq suliassatigullu ataqatigiissaarinissaq taamaaliornikkut misigisassanik inniminniinernik, pilersaarusiornernik ingerlatsinernillu ataqatigiinnerusumik suliaqartoqarnissaa qulakkeerneqarpoq – pingaartumik umiarsuit takornariartaatit tulannerannut atatillugu.
Takornarialerinermut allaffimmit ilaatigut najukkami suliaqartut suleqatigalugit umiatsianik angallassinernik ataqatigiissaarisuunerup, takornariartitsisoqarluni illoqarfimmi angalaarnernik ineriartortitsinerup aamma tikinnermiit naammassinissaata tungaanut tikeraartoqartitsinerup akisussaaffigineqarnissaa naatsorsuutigineqarpoq Kulturikkuttaaq misigisassaqartitsinerup ineriartortitsineq sulissutigineqarpoq soorlu kaffillerneq, nipilersorneq, qitinneq aamma najukkami oqaluttuarisaanermik ingerlatitseqqiineq.
Suliniuteqarnermi najukkami suliffeqarfinnik arlalinnik suleqateqarneq aallaavigineqarpoq, tassani pitsaanerusumik ataqatigiinnerusumillu takornariaqartitsisarnermik pilersitsinissaq siunertaavoq. Tamanna Paamiut ornigassatut pitsaassusissaanik tikinneqarsinnaaneranillu pitsanngorsaataasinnaasutut nalilerneqarpoq, pingaartumik umiarsuarnik takornariartaatinit soqutiginnikkaluttuinnarneq malillugu.
“Tunngavissaqarluarpugut ineriartortitseqqissinnaasatsinnik. Najukkami arlalinnik suliniuteqarnikkut aamma takornariartitsisarnernik ineriartortitsiinnarnikkut ukiuni aggersuni Paamiut tikeraartoqarnerunissamut piareersimalluarpoq,” Avaaraq Olsen oqarpoq.
Kommuneqarfik Sermersuumit Paamiuni ineriartorneq ukiuni aggersuni suli ingerlaannassasoq naatsorsuutigineqarpoq. Najukkami suliaqartartunik suleqateqarluarnerulernikkut, takornariaqarnermik inuussutissarsiornermik pitsanngorsaanermik ingerlatsiinnarnikkut aamma umiarsuarnik takornariartaatinit ujartuinerit annertusiartornerisigut ineriartortitsinerunissamut patajaatsumik tunngavissaqarpoq.