MISI-mit ilisimatitsissutigineqarpoq, ullumikkumiit angajoqqaanit nalinginnaasumik saaffiginninnerit MISI-mit tiguneqartarunnaarmata.
MISI-mit perorsaanikkut tarnip pissusiinik naliliinernut (PPV)-nut atatillugu angajoqqaat suli naapinneqartassapput suleqatigineqarlutillu. Tamatumani meeqqamik malinnaaviginninnerit aalajangersimasut kiisalu atuarfik paaqqinnittarfilluunniit suleqatigalugu suliatigut naliliinerit siunnersuinermi aallaavigineqarnissaat qulakkeerneqassaaq.
MISI tunngaviusumik atuarfinnut paaqqinnittarfinnullu siunnersuisarfiuvoq. Ukiunili kingullerni siunnersuisarfik amerliartortunik angajoqqaanit nalinginnaasumik saaffiginnissutinik tigusisoqartarpoq, ilaatigut kommunimi ersarissumik allatut periarfissaqannginnera pissutigalugu. MISI-mit angajoqqaanut siunnersuinerit pingaarnertut PPV-nut atatillugu ingerlanneqartarput, tassani meeqqap avatangiiserisartagaani malinnaaviginninnerit aallaavigineqartarput.
Kommuneqarfik Sermersuumi ilaqutariinnut suliniuteqarnerit massakkut annertusarneqarnikuupput aamma Meeqqanut Ilaqutariinnullu Ingerlatsivimmi “matut sisamat” pilersinneqarnikuullutik, tassani innuttaasut ajornartorsiutinik nalinginnaasunik assigiinngitsunillu ikiorneqarsinnaapput. Taamaattumik piffissanngorpoq MISI-mit atuuffiup eqqarsaatigeqqinneqarnissaa pingaarnertullu suliassarisimasamut uteqqittoqarnissaa.
Angajoqqaanik siunnersuinerit maannakkut ingerlanneqartut naammassineqarnissaata tungaanut ingerlatiinnarneqassapput.
“Taamatut allannguuteqarnermi sulinerup ersarissuunissaanik pitsaasuunissaanillu qulakkeerinnittoqassaaq peqatigitillugulu perorsaanikkut tarnip pissusiinik suliniuteqarnermi pitsaassutsimik pitsaanerulersitsisoqassaaq,” immikkoortortami aqutsisoq Arnannguaq Jakobsen oqarpoq.