Tallimanngorneq martsip 20-iani, Nuummi ulloq naallugu atuarfittut taagorneqarsimasoq nutaamik atertaartinneqarpoq. August 2025 aallarnerfigalugu atuarfik ammarpoq, maannakkullu nammineq ateqalerluni, Ilasiaq – atuarfiup ineriartorneranut kinaassusaanullu alloriarneq pingaarutilik.
Atertaava ataatsimoorussamik toqqarneqarpoq
Atissamik toqqaanissamut atatillugu siorna septemberimi unammisitsineq ingerlanneqarpoq, atuartut, angajoqqaat sulisullu peqataaffigisaannik. Atissamik siunnersuutit akornanni, sisamat ingerlaqqipput, kingorna kommunalbestyrelsimit aalajangiiffigineqartunik. Atuarfiup aqqa nutaaq atuartunit marlunnit uleerneqarpoq.
Aqqanik unammisitsinermi ajugaasoq, Ruth Jaboksen, siunnersuuteqarnermini ima ilaatigut tunngavilersuuteqarpoq:
Ilasiaq isumaqarpoq “ilassarsiaq”, upperisatoqarlu malillugu isumaqarluni qitornartaaq. Oqaluttuatoqqat naapertorlugit Ilasiaq piniartorsuusimavoq immikkuullarissoq, inuiaqatigiinnut pingaarutilik sunniuteqarluartorlu. Qularutigineqanngimmat, atuarfimmi atuartut minnerusumik annerusumilluunniit Ilasiatulli siunissami nunaqqatiminnut siunniuteqalerumaartut, taammaattumik ateq taanna tulluartillugu siunnersuutigisimavaa.
Immikkoortortaqarfiit marluk
Immikkoortut marluk taaguuteqalerput Aappaluttoq aamma Tungujortoq, illut qalipatai aallaavigalugit.
Atuarfik marlunnik immikkoortortaqarpoq: ataaseq Nuummi siornatigut ASK-imut immikoortortaanikoq, massakkut taaguuteqalertoq Aappaluttoq. Tassani atuartuupput atuartut autismespektrum iluani ersiutillit. Aappaalu Nuussuarmiippoq Tungujortoq, tassanilu atuartuupput ADHD-imik ersiutillik, Downs syndromertut kiisalu immikkut pisariaqartitsisut.
Ulloq nuannaarfiusoq, ataatsimoorfiusorlu
Atuarfiup atertaarneranut tunngatillugu atuarfiup pisortaa, Randi Jerimiassen Jakobsen ilaatigut ima oqalugiarpoq:
“Atuartuutinnguagut assigiinngeqqissaaraluartut tamarmillu assigiinngitsunik pisariaqartitsigaluartut, tamatta assigiimmik pingaartitaqarpugut, tassalu ullut tamaasa atuartut pitsaasumik ineriartortuarnissaat, inissaqartutut misiginissaat, toqqissisimanissaallu.”
Atuartut immikkut pisariaqartitsisut pitsaanerpaamik atugaqarnissaannut, peqatigiillutik alloriarnerup tullissaannut ingerlaqqinnissaminnut qilanaarnini aammattaaq oqaatigaa. Sulisunullu, naqqaniit ineriartortitseqataasimasunut aamma qujaniarpoq.
Ulloq manna nipilersornermik, atuartut suliarisimasaanik saqqummersitsinermik kiisalu kaffi kaaginillu sassaalliinermik imaqarpoq. Atuartut, angajoqqaat sulisullu ullormi tassani ataatsimoorlutik ullorsioqatigiipput.
