Kommuneqarfik Sermersuumi illoqarfinni nunaqarfinnilu tamani 9-niit 21-nut ukiulinnut sunngiffimmi klubbinut immikkoortumut pilersaarut nutaaq kommunalbestyrelsimit akuersissutigineqarpoq. Immikkoortumut pilersaarut atorlugu ukiuni aggersuni suliassaqarfiup inerisarnissaanut pingaarnertut pilersaarusiamik siunnerfilersorneqarnera aalajangersarneqarpoq.
Atuareernerup kingorna ataatsimuussutsimut, atugarissaarnermut misigisassanullu pitsaasunut najoqqutassat nukittorsarneqarnissaat siunertaavoq – sukumiisumilli suliniutissat pingaarnersiugassallu iliuusissatut pilersaarutissami aamma politikkikkut missingersuutinik suliaqarnermut atatillugu aatsaat inissinneqassapput.
– Sunngiffimmi klubbit inuusuttorpassuit ulluinnarni inuunerannut pingaarutilittut inissisimapput. Taakkunani namminiusinnaapput, ikinngutiminnik naapitsisarput, sammisassanik nutaanik misileraasarput inersimasunillu tapersersorneqartarput. Immikkoortumut pilersaarut atorlugu suleriaqqinnissatsinnut erseqqissumik tikkuussivugut, taama oqarpoq Poul Petersen, Kommuneqarfik Sermersuumi Meeqqanut, Ilaqutariinnut Atuartitaanermullu Ataatsimiititami siulittaasoq.
Ineriartortitsinissamut pilersaarusiukkamik tikkuussineq
Immikkoortumut pilersaarut ukiuni arlalinni ineriartortitsinermik suliaqarnissamut alloriarfiuvoq siulleq. 2026-p aamma 2027-p ingerlanerini iliuusissatut pilersaarutit sukumiisut suliniutinik sorlernik pingaarnersiuisoqarneranik, qanoq suliarineqarnissaannik aamma sulisunik qanoq annertutigisunik pisariaqartitsisoqarneranik allaaserineqassapput.
– Immikkoortumut pilersaarutip akuersissutigineratigut sulinissatsinnut ataatsimut pilersaarusiukkamik toqqammavissaqalerpugut. Suliniutissat aningaasaqarnerlu pillugit aalajangiiffigisassat iliuusissatut pilersaarutissani missingersuutillu pillugit isumaqatigiinniarnerni aalajangiunneqassapput, Poul Petersen oqarpoq.
Immikkoortumut pilersaarut naapertorlugu pisariaqartitat ilaatigut makku erseqqissaatigineqarput:
- klubbimi avatangiisit toqqissisimanartuussasut ineriartorfiussasullu qulakkeerneqarneri
- meeqqat inuusuttullu atugaannik ataatsimuussusaannillu nukittorsaaneq
- sulisut suliatigut ineriartornissamut periarfissaqarluarnerulernerat
- illuni init ullutsinnut naleqqunnerusuni sulinissaq
- kulturimik, kinaassutsimik sumullu attuumassuteqarnermik nukittorsaaneq
- digitalikkut aaqqiissutit siunnerfeqarnerusumik atorneqartarneri
Ingerlarnga iliuusissallu tullia
Suleriaqqinnissami meeqqat inuusuttullu, sulisut soqutigisaqaqatigiillu allat iliuusissatut pilersaarusiornermi peqataatinneqarumaarput. Peqataatitsinerup qanoq ilusilersorneqarnissaa piffissaliunneqarneralu suleriaqqinnermut atatillugu nalunaartoqarumaarpoq.