Nuummi atuarfiit marluk oqoqarneri pissutaallutik matusariaqalerneriniit maanna qaammatit sisamanngulerput. Atuarfinnik matusineq puullaaqititsivoq piffissamilu nuuttoqarneranik, sungiussassanik nutaanik aaqqiissutaagallartunillu perulluliorfiulluni. Maanna atuartut sulisullu eqqissisimanerulerput.
Atuartut 1000-t missaanniittut kalluarneqartut Nuummi atuarfinnut arlalinnut agguataarneqarput, ilaatigut Kangillinnguit Atuarfiannut, Nuussuup Atuarfianut, Cafe Tamumut, Nipilersornermik Ilinniarfimmut illoqarfimmilu sumiiffinnut allanut. Ajornaquteqanngitsumik nutserneq suliffeqarfimmit nutserisunit qulakkeerneqarpoq atuarfinnillu tigusisunit atuartut tikilluaqquneqarsimasut paasivarput.
– Pineqartunut tamanut allannguut annertuvoq maannali atuartut atuarfimminni nutaani eqqissisimanerulersut misigaarput, taama oqarpoq Riikki Grønvold, Kommuneqarfik Sermersuumi atuarfinnut fagchefi.
Klassini atuareernerup kingorna ornittagaqarneq
Atuarfiup INUSSUUP ammarnissaata tungaanut, atuareernerup kingorna ornittakkani sammisassaqartitsisarneq (AKO) atuarfinni tamani klassit inaannut utaqqiisaasumik nuunneqarallarput. Aallaqqaataani tamanna ilungersunartuuvortaaq – pingaartumik AKO-mi sulisunut Atuarfik INUSSUMMI sulilersussanut maanna avissaarlutik sumiiffinni arlalinni sulisaramik. Aaqqissuunneqarnerali tamanna inissikkiartuaarneqarpoq.
– Sulisorisavut siaruarterneqarput. Nikerartumik sulisariaqarsimapput, tamannalu anguaat. Atuarfiit akimorlugit suleqatigiissinnaagamik nersualaartariaqarput, Riikki Grønvold oqarpoq.
Oqaatigaattaaq ingerlatsivik atuarfinni aqutsisut peqatigalugit angajoqqaanik ataatsimiititseqqammerlutik, tassani angajoqqaat meeqqami atuariartortittarnissaannik ajornartorsiortarnerat sammineqarluni.
Tunuleriaattorpassuaqartarnerata kingunerisaanik bussini inissaqartuaannarneq ajortoq ataatsimiinnermi paasivarput. Atuartut taamaalillutik bussinut tulliinut utaqqisariaqartarlutik – kingunerisaanillu inortuisarlutik.
– Angajoqqaat angusaqarusussuseqarnerat isumakuluutiminnillu erseqqissumik oqaatiginnittarnerat assut iluarusuutigaarput. Sukkasuumik aaqqiinissatsinnut iluaqutaapput. Bussinut ingerlatseqatigiiffimmik oqaloqateqareernermi ullaakkut angallattut ikilisarniarlugit angajulliit takkuttarnissaat 30 minutsimik kinguartinneqarpoq, Riikki Grønvold paasissutissiivoq.
Bussit angalasarfii pisariaqartitsineq naapertorlugu ataavartumik naleqqussarneqarsinnaaniassammata Nuup Bussii kommunimit ataavartumik attaveqarfigineqartarput.
Pilersaarut ajunngitsumik ingerlavoq
Atuarfik INUSSUMMIK sanaartornermi kommunip aqutsisooqatigiivinit oqaatigineqartoq naapertorlugu neriuuteqarluarlutik. Ikuallattoqartillugu namminerisamik qamisaasartunik – sprinkleranlæginik taaneqartartunik – atuarfimmi peqannginnerani pilersitsiniarneq pilersaarutit malillugit ingerlasoq paasissutissiipput.
– Atuarfimmi nutaarluinnarmi isumannaatsuusumilu atuartut tikilluaqqujumaarivut naatsorsuutigilluinnarparput. Pilersaarutit malillugit sanaartorneq ingerlanneqarpoq, aamma ukioq manna aggustip aallaqqaataani atuarfiup ammarnissaanut piareereersimassasoq naatsorsuutigaarput, Søren Sohn Krog Pedersen, Sanarfinermut Avatangiisinullu Ingerlatsivimmi pisortaq oqarpoq.
Suli qaammatialuit ingerlasussaapput, aamma killiffimmi suli allanngorarnissaq suleqatigiinnissarlu pisariaqaraluartut, atuartut sulisullu akornanni qaammatinut siullernut sanilliullugu maanna eqqissisimanerujussuupput.
– Naak suli naammassinngikkaluarluta, ukiarmi atuarfiit oqummik eqqugaasut eqqarsaatigalugit pisunut sanilliullugu maanna allaanerujussuarmik inissisimavugut. Ullut ataqatigiissumik ingerlanneqaqqilerput, matumani angajoqqaat pikkorissut aamma paasinnillutillu suleqatiginnikkusuttut pissutaapput, Riikki Grønvold oqarpoq.
Aaqqissuussaaneq eqqissisimalersitsivoq