Inuussutissarsiornermi aqutsisut 65-init amerlanerit marlunngornermi peqataapput, Nuummi Oqalliffimmit inuussutissarsiortut aamma Kommune siunissami nunaminertat inuussutissarsiorfiit pillugit Katuami katersuutsinneqarmata. Nuummi Oqalliffik tassaavoq Kommuneqarfik Sermersuumit suliniut nutaaq.
Ataatsimiinnermi sammineqarpoq nunaminertat inuussutissarsiorfiit siunertaavorlu takorluukkamik ataatsimoorussamik aallartisarnissaq, Nuummi nunaminertat inuussutissarsiorfiit qanoq pilersaarusiugaanerusumik ineriartortinneqarnissaannut, tamannalu inuussutissarsiortut aamma Kommuneqarfik Sermersuup qanimut sunniivigeqatigiinnerisigut pissaaq.
Borgmesteri Avaaraq Olsen, tikilluaqqusivoq ullullu qanoq ingerlanissaanut erseqqissaalluni, kingorna Kommuneqarfik Sermersuumit nunaminertat inuussutissarsiorfiit piusut killiffiat kiisalu pilersaarusiornermut, piginnittuunermut attaveqaasersuutinullu sinaakkutissanut qitiusumik atugassarititaasut saqqummiunneqarput.
“Pingaaruteqarpoq uagut inuussutissarsiortunik qanimut ammasumillu oqaloqateqartarnissarput, siunissami Nuummi nunaminertanik inuussutissarsiorfinnik pilersaarusiuleraangatta. Eqqortunik aalajangiisarsinnaasaqqulluta inuussutissarsiortunit nutaanik saqqummiussiffigineqartarnissarput pisariaqarpoq taamaalilluta aaqqiissutinik piviusorsiortunik aamma imminut napatissinnaasunik pilersitsisinnaaqqulluta, Kommuneqarfik Sermersuumi pilersaarusiornermut oqartussaaffeqarfimmullu pisortaq, Runa Sværd oqarpoq.
Ataatsimiinnermi pingaartinneqarluni qitiutinneqarpoq suliassaqarfiit assigiinngitsut immikkoortukkuutaarlutik takorluukkaminnik oqaloqatigiillutik nerrivinni workshopperfiusuni suliaqarnerat. Matumani peqataasut maannakkut nunaminertani inuussutissarsiorfiusuni unammilligassat aamma siunissami pisariaqartitat eqqartorpaat – sumiiffiit, tikikkuminassutsit, attaveqaasersuutit aamma sinaakkutissatut atugassarititaasut ilanngullugit.
Ataatsimiinneq ataatsimoorluni eqikkaanermik naammassineqarpoq, suliassaqarfinnit ataasiakkaanit pingaarnertut tikkuakkat saqqummiunneqarput oqaluuserineqarlutillu. Ullormit aaqqissuussiffiusumit nutaatut saqqummiunneqartut suliniaqqinnissamut ilanngunneqarput, tassunga atasumik Rambøll Kommuneqarfik Sermersuumik suleqateqarluni siunissami Nuummi nunaminertat inuussutissarsiorfiit pillugit takorluukkatut saqqummiussamik ataatsimoortumik suliaqassapput.
Nuummi Oqalliffik tassaavoq inuussutissarsiortut aamma Kommuneqarfik Sermersuup akornanni aalajangersimasumik oqalliffik. Tassani inuussutissarsiornermut maanna pissutsit aamma pilersaarusiornermut tunngasut oqaluuserineqartarput ineriartorneq, suleqatigiinneq aamma aaqqiissutit ataatsimoorussat pingaartinneqarput.
Nuummi Oqalliffimmut ilaasortanngorit
Suliffeqarfiit aamma inuussutissarsiuummik ingerlataqartut Nuummi Oqalliffimmi peqataarusuttut immikkoortortami aqutsisumut saaffiginnissapput; Salik Damgaard på mail: slkd@sermersooq.gl.
