Borgmesteri Avaaraq Olsen Tromsømi Københavnimilu piffissami eqqissisimaffiunngitsumi nunani tamalaani attavinnik pitsanngorsaanissaq ukkataralugu angalavoq. Angalanermi Arctic Mayors’ Forum ukkatarineqarpoq, tassani Avaaraq Olsen siulittaasuuvoq kiisalu kommune ikinngutigisaq København.
Tromsømi borgmesteri ataatsimeersuarnermi Arctic Frontiersimi peqataavoq, tassani Arctic Mayors’ Forumimi Issittumi borgmesterit issittumi unammilligassat assigiinngitsunilu suleqatigiinneq oqallisiginiarlugu ataatsimiipput. Tamatuma saniatigut nunani tamalaani oqallinnermi ataatsimut oqaaseqarnissaq pitsanngorsarniarlugu issittumi suleqatigiinneq europamiit aallartitanik arlaleriarlutik ataatsimeeqateqarput.
”Arctic Frontiersimi Tromsømilu ataatsimiinnerni issittumi ataatsimoorneq qanoq nukittutiginersoq takutinneqarpoq. Arctic Mayors’ Forumimi siulittaasutut Issittumi borgmesterit attaviinik pitsanngorsaanissaq aamma ataatsimut oqaatiginiakkagut nunani tamalaani tusaaneqarnissaannik qulakkeerinninnissaq uannut pingaaruteqarpoq. Peqatigitillugu Kalaallit Nunaannut kalaallinullu tapersersuinerup, illersorneqarnerup ikorfartorneqarnerullu misiginera isumalerujussuuvoq, pingaartumik piffissami misigisatsinni,” borgmesteri Avaaraq Olsen oqarpoq.
Kommuneqarfik Sermersooq aamma Tromsø Kommune kommunitut ikinngutigiipput, borgmesterillu Tromsømi tikeraarnerani ilaatigut Avaaraq Olsenip peqataaffigisaani naatsumillu oqalugiarfigisaani Kalaallit Nunaat tapersersorniarlugu akerliussutsimik takutitsinermi ikinngutigiinneq taanna takutinneqarpoq
Tromsøminngaanniit angalaneq kommunimut ikinngutigisamut allamut, Københavnimut, angalaneq ingerlaqqippoq tassani Kommuneqarfik Sermersuup Københavns Kommunellu akornanni ikinngutigiittut suleqatigiinnermut ilaasutut Avaaraq Olsenip Københavnimi borgmesteriuneq nutaaq ataatsimeeqatigaa. Tassani illoqarfiit pingaarnersaasut akornanni atassuteqarneq nukittuup qanimullu attaveqarnerup pingaaruteqassussaa ersarissarneqarpoq:
”Illoqarfiit pingaarnersaattut ataatsimut akisussaaffeqarpugut, ataatsimut pisussaaffeqarpugut immikkullu ittumik atassuteqarpugut – tamanna pingaartissavarput. Taamaattumik Kommuneqarfik Sermersuumik suleqateqarneq nuannaarutigeqaara aamma illoqarfittut ikinngutigiittut atassuteqarnermut qaninnerusoq ingerlateqqissavarput. Tamanna nunarsuarmut ataqqinninnermik, naligiinnermik soqutigisaqaqatigiinnikkullu angusaqarnerusoqarsinnaaneranik takutitseqataassaaq. Piffissami matumani tamanna aatsaat taama pingaaruteqartigaaq pisariaqarluinnarlunilu,” Københavns Kommunemi borgmesteriuneq Sisse Marie Welling oqarpoq.
”Borgmesteriunerup nutaap kommunitta marluusut akornanni qanimut tatigeqatigiiffiusumillu suleqatigiinnerup ineriartortitseqqikkusunnera malugalugu pitsaasorujussuuvoq. Piffissami eqqissisimaffiunngitsumi ikinngutit iligisallu pingaaruteqarput tapersersorneqarnerlu malugilluinnarparput – minnerunngitsumik pisortatigoortumik isumaqatigiinnikkut, suliniutinut aalajangersimasunut misilittakkanillu avitseqatigiinnissamut periarfissaqarnerulersitsiffiusumi. Ilaatigut nuannaarutigaara Københavnimi upalungaarsimasut ilai Nuummukangajalermata, tassani immitsinnut ilinniarfigeqatigiissaagut ataatsimullu pisinnaasatsinnik pitsanngorsaalluta” Kommuneqarfik Sermersuumi borgmesteri Avaaraq Olsen oqarpoq.