Nuummi Piginnaasanik inerisaavik ukioq kingullerlu aggustimiit inuusuttunut 16-iniit 28-anut ukiulinnut tarnimikkut imaluunniit timimikkut piginnaasakillisimasimasunut immikkut ittumik ingerlatsinissamik neqerooruteqarput. Massakkumut inuusuttut sisamat aaqqissuussamut ilaapput, misilittakkaniillu ersarissumik pitsaasumik ineriartortoqarnera takutinneqarpoq.
– Inuusuttuni peqataasuni siullerni pitsaasumik ineriartornermik takuvugut, atassuteqaqatigiinnerit aamma ersarissumik aaqqissuussinermik siunnerfilimmik sulisoqarluni. Inuttut ataasiakkaatut ineriartorput aamma imminnut tatiginerulerput, Malene Henningsen Jensen, Piginnaasanik inerisaavimmi aqutsisoq oqarpoq.
Inuusuttunut immikkut pisariaqartitsisunut neqeroorut toqqissisimanartoq
Inuusuttunut tarnikkut timikkullu assigiinngitsunik piginnaasakillisimasunut neqeroorut sammiveqarpoq, ilinniagaqarnerup iluani imaluunniit suliffeqarnermut tunngasuni unammilligassaqarsimasunut. Ukioq ataaseq ingerlatsisoqarpoq aamma inuttut ineriartorneq, inuttut piginnaasat suliamullu tunngatillugu qulaajaaneq pingaartinneqarput.
Inuusuttut ataasiakkaat pisariaqartitaat tunngavigalugit avatangiisini toqqissisimanartuni aaqqissuussaasunilu ineriartornissamut periarfissaqartinnissaat siunertaavoq. Ilaatigut ulluinnarni piginnaanernik aamma namminneersinnaanermik, inuttut atassuteqarnernik pilersitsinermik nukittorsaaneq, ilinniarnikkut aamma suliffitsigut periarfissat qulaajarneqassapput kiisalu nammineq inissisimaffimmut, inuiaqatigiinnut kulturikkullu ikorfartuineq suliarineqassapput.
– Inerisaavimmi naatsorsuutigineqartut naammassineqarsinnaaneri takusinnaallugu nuannerpoq, aamma inuusuttut immikkut pisariaqartitsisut amerlanerit angusinnaalernissaat kissaatigaarput Malene Henningsen Jensen, oqarpoq.
Najukkami neqeroorut
Siusinnerusukkut inuusuttut amerlasuut immikkut pisariaqartitsisut Danmarkimi STU-mik ingerlatsinermut innersuunneqartarput. Nuummi Piginnaasanik inerisaaveqalernikkut maanna inuusuttut angerlarsimaffimminnut qanittumi aamma oqaatsitik atorlugit ingerlatsinermut peqataasinnaalerput.
– Sulisut oqaatsiminnik ilitsoqqussaminnik oqaluttut naapittarpaat, aamma taamaalillutik ilutigisaanik kulturinut nutaanut nalimmassartariaqaratik. Ineriartornissamut pitsaanerusumik tunngavissaqarluarnerulissapput, Malene Henningsen Jensen, oqarpoq.
Ukiunut sisamanut misiligutitut suliniut
Piginnaasanik inerisaavik ukiunut sisamanut misiligutitut suliniutitut pilersitaavoq. Piffissaq misiliiffiusoq naammassippat, Kommunalbestyrelse neqeroorutip aaqqissuuteqqinneqarnissaanut isummissaaq. Inuttut iluanaarutit saniatigut neqeroorut aamma aningaasatigut iluaqutissartaqarpoq, nunani allani atuarnermut atatillugu akunninnermi angalanermut aamma najugaqarnermut aningaasartuutit annertusarmata.
Ima inissarsissaatit
Kommunimi sullissisut aqqutigalugit innersuussilluni qinnuteqarneq ingerlanneqarsinnaavoq. Inuusuttut immikkut pisariaqartitsisut – imaluunniit qanigisat inuusuttumik ilisarisimannittut neqeroorut iluaqutigisinnaammassuk– paasissutissanik amerlanerusunik pissarsiniarlutik sullissisuminnut saaffiginninnissaannik innersuunneqarput.