Qaammatini tulliuttuni illoqarfimmi nalinginnaasumiit sakkutooqarnerullunilu sakkutooqarfinnilu sulisut amerlasuut Nuummiut malugissavaat. Tamanna Illersornissaqarfimmit aamma Issittumi Sakkutooqarfimmit 2026-mi Issittumi aamma Atlantikup avannaani pilersaarutaasumik suliaqarnerannut sungiusarnerannullu atatillugu pissaaq.
Issittumi Illersornissaqarfiup suliaqarnerunissaa piffissami sivisuumi pilersaarutaavoq Nuullu qitiusumik kateriffiit ilagaat. Taamaattumik sakkutooqarnerulernera sivisunerusumik pilersaarutaareersumillu ingerlatsineruvoq pinartumillu pisoqarneranik takussutissaanani.
Borgmesterimit Avaaraq Olsenimit Issittumi Sakkutooqarfimmi pisortaq Søren Andersen ataatsimeeqatigineqarpoq, tassani innuttaasunut ingerlaavartumik paasissutissiinissaq qanimut suleqatigiissutigissallugu isumaqatigiissutigaat. Ammasumik ersarissumillu attaveqaqatigiinnissamik qulakkeerinninnissaq siunertaavoq taamaalillutik innuttaasut piffissami aggersumi sunik naatsorsuuteqassanerlutik nalunnginniassammassuk. Suliat Kalaallit Nunaanni oqartussanut attuumassutillit qanimut oqaloqatigiissutiginerisigut ataqatigiissaareqatigiinnikkullu ingerlanneqassapput.
“Sakkutuut tikerlaat kommunitsinnut uummammik pisumik tikilluaqqorusuppakka. Nuuk illoqarfiuvoq ammasoq aamma Issittumi Sakkutooqarfimmi oqaloqatiginnilluarneq suleqateqarluarnerlu qujassutigaarput,” borgmesteri Avaaraq Olsen oqarpoq.
Issittumi Sakkutooqarfimmi illoqarfimmi sakkutuut amerlinerat inuit ilaannut nalinginnaasuunngikkaluartoq ernumanissamut tunngavissaqanngitsoq pisortamit erseqqissarneqarpoq.
“Illoqarfimmi sakkutooqarnerulernera maluginiarneqarsinnaasoq ilisimalluarparput. Sulisuttali innuttaasunit tikilluaqquneqartarneri misigisarparput, tikilluaqqusinerlu qujassutigingaarparput,” Søren Andersen oqarpoq.
Illersornissaqarfimmiit suliaqarneruneq assersuutigalugu attaveqaasersuutinik pingaarutilinnik nakkutiginninnermik aamma Nuummi eqqaanilu timmisartunik umiarsuarnillu atuutsitsilernissamik imaqarput.
Naggasiutigalugu ersarissarneqarpoq, sakkutuut tikeraarnerminni illoqarfiup iluani nalinginnaasumik takussaassasut. Suliaqanngikkaangamik allatuulli illoqarfimmiittassapput ulluinnarni peqataallutik.
“Sakkutuut tikerlaat allatuulli illoqarfimmi najugalittut ipput. Tikeraarnerminni allatuulli suliffilittut, sunngiffeqartutut ulluinnarnilu Nuummiittartutut illoqarfimmiittassapput. Maaniinnerminnili nunamik isumannaallisaanermut tunngasunik pingaarutilinnik aamma suliassaqarput,” borgmesteri Avaaraq Olsen naggasiivoq.