Kommuneqarfik Sermersuumi Missingersuutit pillugit isumaqatigiissut 2025-2026-mi partiit isumaqatigiissuteqartut Tasiilami attaveqaasersuutinik pitsanngorsaanissaq ukkatariniarpaat. Aqquserngit pitsaasut atorluarsinnaasullu ulluinnarni toqqissisimanermut, inuussutissarsiornerup ingerlalluarneranut aamma illoqarfiup ineriartuinnarnissaanut pissutaasarput. Aaqqiissuteqarnermittaaq pinngortitaq, silaannaq aamma Tasiilami kulturi immikkuullarissoq oqaluttuassartaalu eqqarsaatigineqassapput.
Anguniagaq erseqqippoq: Illoqarfimmi angallanneq ajornannginnerussaaq, isumannaannerulluni toqqissisimanarnerullunilu – innuttaasunut, tikeraanut suliffeqarfinnullu.
Asfaltilersuineq aserfallatsaaliinerlu ingerlaqqissapput
Tasiilami aqqusinernik asfaltilersuinerup nanginneqarnissaa aamma sulinermi immikkoortup tullianut ingerlaqqinnissaq missingersuutinut isumaqatigiissummi ilanngunneqarpoq. Asfaltilersuineq aqqutigiuminarnerulersitsissaaq aqquserngillu nungullarnerannik, pujoralammik aamma maniinnernik annikinnerulersitsissalluni.
Nuummittaaq asfaltilersuinissamut kommunalbestyrelse Missingersuutit pillugit isumaqatigiissut 2025-2026-mi aningaasanik immikoortitsivoq. Taamaaliorneq kommunimi tamani suliniutit ataqatigiinnerunissaannik qulakkeerinnissaaq, illoqarfimmilu pingaarnermi aamma isorliunerusuni aqquserngit pitsaanerulersinneqarlutillu ullutsinnut tulluarnerulersinneqassapput.
Taassuma saniatigut Tasiilami aqqutit iluarsartuunneqartarnissannut aserfallatsaalineqartarnissaannullu aningaasanik immikkoortitsisoqarpoq. Tassani aqquserngit kisimik pineqanngillat, aammali ikaartarfiit tummeqqallu illoqarfiup attaveqaasersugaaneranut pingaaruteqartut eqqarsaatigineqarput. Aaqqiissussaasumik aserfallatsaaliinermi attaveqaasersugaanerup ajornerulerani pitsaasuunissaa qulakkeerneqassaaaq.
Eqqakkanik passussineq ataatsimullu ingerlatsineq
ESANI A/S-ip ingerlatsineranut akiuliuteqartarnerup ingerlaannarnissaa missingersuutinut isumaqatigiissummi qulakkeerneqarpoq, taamaalilluni Tasiilami tigooraavik aalajaatsumik ingerlasinnaaniassammat. Tigooraavik siullermeerluni misissoqqissaarneqareerpoq, taamaammallu sulineq aallartillualereerluni.
Eqqagassanik passussineq ingerlalluaraangat avatangiisinut, peqqissutsimut aamma illoqarfiup najoruminartuunissaanut apeqqutaasarpoq, taamaammallu attaveqaasersuutinut illoqarfiullu ineriartornissaanut kommunip ataatsimut suliniuteqarnerani ilaatinneqarmat pissusissamisoortuulluni.
Ingerlatsinermut siunissamilu ineriartornermut tunaartat pitsaanerusut
Tasiilami atortussaasivimmik nutaamik pilersitsisoqarsinnaaneranut pilersaarusiornerit suliniutigineqaqqinnissaat missingersuutinut isumaqatigiissummi anguniagaavoq. Atortussaasivimmik nutaamik sananikkut sulinermi najukkami ingerlatsinermut aserfallatsaaliinermullu periarfissat pitsaanerit pilersinneqassapput.
Ilanngullugu Innaqiit eqqaanni ujaqqanik immiisoqarsinaanera pillugu misissueqqissaarnermik ingerlatsisoqassaaq. Sumiiffiup taassuma siunissami atorneqarsinnaaneranut periarfissai inuussutissarsiornermilu atorneqarsinnaaneranut tunngavimmik patajaannerusumik pilersitsinissaq siunertaavoq.
Illoqarfinnik ineriartortitsinermut periusissiamut ilaatinneqarpoq
Tasiilami suliniutaasut Kommuneqarfik Sermersuumi illoqarfinnik aamma sanaartornernik ineriartortitsinermut tamakkiinerusumik isiginnittariaaseqarnermut ilaapput. Missingersuutit pillugit isumaqatigiissut 2025-2026-mi kommunalbestyrelsep kissaatigaa sanaartugassatut suliniutit sukkatsinneqarnissaat, attaveqaasersuutit piginnaaneqarnerulersinnissaat aamma ineriartortitsinerup silamut, pinngortitamut najukkamilu pissutsinut oqimaaqatigiissakkamik ingerlanneqassaata qulakkeerneqarnissaa.
Aqquserngiornernut, ingerlatsinermut aamma atortorissaarutinut aningaasaliinikkut illoqarfik aalajaannerusoq innuttaasunut ulluinnarni ingerlalluarfiunerusoq pilersinneqassaaq – aammattaaq siunissami siuariartornissamut ineriartornissamullu periarfissanik pitsaanerusunik pilersitsiffiuvoq.