2026-mut missingersuutit pillugit allaaserisat nangeqattaartut tallimaat
Aalisarneq piniarnerlu Kalaallit Nunaanni tunngaviuvoq – kulturikkut, aningaasaqarnikkut aamma oqaluttuarisaanikkut. Taama inuussutissarsiuteqarneq illoqarfinni nunaqarfinnilu kinguaariit nerisassaqarnissaannut, isertitaqarnissaannut aamma ataqatigiinnissannut qulakkeerinnippoq. Kommuneqarfik Sermersuumittaaq aalisartut piniartullu inuiaqatigiit ineriartornissaannut ulluinnarnilu qitiulluinnarlutik inissisimapput.
Missingersuutit pillugit isumaqatigiissut 2025-2026-mi partiit isumaqatigiittut politikkikut erseqqissumik anguniagassiipput: Aalisarnermik piniarnermillu inuussutissarsiuteqarneq kommunimi tamani inuussutissarsiornermut tunngaviusussatut nukittorsarneqassaaq. Patajaannerusumik ullutsinnullu naleqqunnerusumik aamma aalisartut piniartullu imminut napatissinnaallutik atugassaqartinneqarnissaat isumaqatigiissummi suliniutissatut anguniagaavoq – isorliunerusut immikkut ukkataralugit.
Suliniutit najukkami aalisartunik, piniartunik, siunnersuisoqatigiinnik aamma kattuffinnik oqaloqateqarnernik aallaaveqassapput, taamaalilluni paasissutissanik tunngaveqarluni aamma najukkami pisariaqartinneqartut atugassarititaasullu aallaavigalugit ineriartortitsisoqarsinnaaqqullugu.
Periarfissat aalajangiinermullu tunngaviit pitsaanerusut
Kommunip umiatsiaaqqanut sannaviutaani aamma puttasuutaani atugassarititaasut ataatsimut paasiniaqqissaarneqarnissaat suliniutigineqassasoq, 2026-mut missingersuutinut isumaqatigiissummi ilaatigut allaqqavoq. Atortut suunerinik tamakkiisumik paasisaqarnissaq aamma sutigut pitsanngorsaasoqarnissaanik sutigullu aningaasaliinissap pisariaqarneranik paasisaqarnissaq siunertaavoq.
Pisariaqartitat suunerisa paasiniarneqarnissaanni ilaatigut pineqartut tassaassapput amoorutit, kuitsiviit, inaalitsiviit periarfissat, sannavinni atugassarititaasut kiisalu eqqakkanut atortunullu nunaminertat. Pingaartumik inoqarfinni mikinerni piniartunut aalisartunullu sullivissaqqissunik ullutsinnut naleqquttunik, isumannaatsumik atorsinnaasunillu atugassaqartinneqarnissap qulakkeerneqarnissaa kissaataavoq.
Tasiilami aalisarnermik inuussutissarsiuteqarneq pitsaanerusoq
Aalisarnermik inuussutissarsiummik imminut napatissinnaasumik ineriartortortitsinermi kommuni suleqataanerussasoq, missingersuutinut isumaqatigiissummi kissaataavortaaq. Najukkami tassunga tunngasunik suliallit siunnersorlugit, piginnaasaat ineriartortillugit aamma pitsaanerusumik atugassaqalersinnerisigut tapersersorneqassapput, taamaalilluni aalisarneq aningaasarsiorfiunerusinnaasumik imminullu napatissinnaasumik siuarsarneqarsinnaassammat.
Suliniuteqarneq suleqatigiinnissamut isumaqatigiissummi inuussutissarsarsiutitut periarfissat pitsanngorsarnissaannut, assigiinngisitaartumik aningaasarsiorsinnaaneq aamma isorliunerusuni attaveqaasersuutit pitsanngorsarnissaannut anguniagaasunut naapertuuppoq. Aalisarnermik inuussutissarsiuteqarneq aalaakkanerusoq suliffissaqarnerulersitsisinnaavoq, innuttaasunik najukkamiiginnarsitsilluni aamma najukkami aningaasarsiornermik periarfissaqarnerulersitsisinnaalluni.
Ittoqqortoormiini naleqalersitsinissamut aqqutit nutaat
Ittoqqortoormiini qerititsiveqarfitoqaq illoqarfimmi piniartunit akeqanngitsumik atorneqarsinnaasunngorlugu ammarneqassaaq. Tamaaliorneq najukkami pisanik suliareqqiisinnaanermut periarfissagissaarnerulersitsissaaq illoqarfimmilu aningaasarsiorfiusinnaasunik nutaanik periarfissaqalersitsisinnaalluni.
Kommunalbestyrelsettaaq missingersuutinut isumaqatigiissummi aningaasanik immikkoortitsinermini aalisarnermik inuussutissarsiuteqarneq pikkorissaanikkut siunnersuinikkullu nukittorsarneqassasoq kissaatigaa. Ilaatigut umimmaat qiviuinik qissinermik pikkorissaanikkut aamma tunisassianik tuniniaaneq naleqarnerulersitsinerlu pillugit siunnersuinerit aqqutigalugit.
Tunumiittaaq Kitaanut tuniniaasinnaanermut periarfissanik pitsanngorsaataasussanik suliniuteqartoqarpoq. Piniartut ullumikkut tuniniaasinnaanerannut killilersuutaasut qanoq annikillisinneqarsinnaanerata paasinissaa pisariaqarpoq. Taassuma saniatigut misissorneqassaaq neqinik aamma qiviunik nuersagassianik Kalaallit Nunaata sinneranut tuniniaanissamut suut periarfissaanersut piumasaqaataanersullu – taakkunanngalu siunissami nunanut allanut tunisassiorsinnaanngornissaq eqqarsaatigalugu.
Naleqalersitsinissamut aqqutinik nutaanik pilersitsinissaq anguniagaavoq Ittoqqortoormiinilu inuussutissarsiorfissatsialaasumi – sulili tamakkiisumik atorneqalinngitsumi – periarfissagissaartitsinerulernissaq siunertaalluni.