2026-mut missingersuutit pillugit allaaserisat nangeqattaartut pingajuat
Kommuneqarfik Sermersuumi inunnut innarluutilinnut aamma isumaginninnermut tunngasunik ukiuni makkunani annertusaanissaq pisariaqartinneqaleriartorpoq. Inuuniarnikkut ajornartorsiuteqartut Nuummut nuuttartut amerliartorput, tamannalu kommunip sukkasuumik suliniuteqarneruleriartornissaanik kinguneqarpoq. Taakkunannga suliassaqarfinnik kommuni pitsanngorsaalluni suliniuteqareerpoq, sulilu suliniuteqartoqarnerunissaa 2026-mut missingersuutini isumaqatigiissutigineqarpoq. Innuttaasut erseqqinnerusumik toqqissisimanartumillu ikiorneqarsinnaaqqullugit ataqatigiinnerusumik aamma sunniuteqarluartumik aaqqissuussaasumik sulinissaq anguniagaavoq – sulisut ullut tamaasa imaannaanngitsunik suliallit piumasaqaateqarfigineqaleraluttuinnartut uani isornartorsiorneqanngillat.
Siunissami aalajangiussassat tunngavissaqartilluarniarlugit suliassaqarfiusuni tamani sukumiisumik misissueqqissaartoqarnissaa piaartumik aallartisarneqassaaq. Suliassat piffissami matumani qanoq aaqqinnissaat, sutigut suleqatigiilluartoqarnersoq aamma sutigut unammillernartut pilertarnerat misissueqqissaarnermi erseqqissarneqassapput. Kommunimi nutaamik suleriuseqalernissaq misissueqqissaarnermi aalajangiusimareerneqassanngilaq, sulinerulli aaqqissuussaanerani sukaterisoqartariaqarnersoq paasiniarneqassaaq – taamaassappallu qanoq iliortoqassanersoq. Misissueqqissaarneq aalajangiisartunut tunngavissiissaaq, suliniutillu suut innuttaasut sukkanerusumik akineqartarnissaannut, erseqqinnerusumik sullissinermut aamma immikkoortortaqarfiit akornanni ataqatigiinnerusumik suleqatigiinnissamut qulakkeerinnissinnaasut misissueqqissaarnermi erseqqissisinneqassapput.
Sulinermi suliassaqarfiit arlallit ulapiffiunerpaasut pineqassapput: inunnut innarluutilinnut tunngasut, utoqqarnut tunngasut, siusinaartumik sulisinnaajunnaarnersiutisiat, suliffeqarneq aamma angerlarsimaffeqanngitsunut tunngasut. Taakkunani amerlasuutigut assigiissutaasarpoq innuttaasut pineqartut immikkut pisariaqartitsisuusarmata, taammattoqartillugulu inuit suliamut immikkut ilisimasallit arlallit akornanni suleqatigiittoqartariaqartarpoq. Taamaammat innuttaasut immikkoortortaqarfinnut assigiinngitsunukaqattaartinneqannginniassammata imaluunniit pisariaqanngitsumik utaqqitinneqannginniassammata suliassat aamma akisussaaffiit erseqissuunissaat pingaaruteqarpoq. Sulinerup aaqqissuussaaneraanik pitsanngorsaanikkut sinaakkutit erseqqinnerulerpata, sulisut suliaminnik pitsaanerusumik aaqqiisinnanngornissaminnut periarfissaqalissapput.
Sulinermuttaaq ilanngullugu inunnut innarluutillinnut politikki nutaaq suliarineqassaaq. Kommunip suliniutigeriigai nutaamik suliniuteqarnikkut inerisaqqinneqassapput, inuillu timikkut tarnikkullu killilimmik piginnaasallit ulluinnarni atugaat pisariaqartitaallu eqqarsaatigalugit tapersersorneqarnissaannik qulakkeerinnissalluni. Politikki taanna innuttaasut ataqqineqarlutik, eqaatsumik periuseqarluni aamma kommunimi ulluinnarni qinigassaqarlutik naapinneqartarnissaannut tapertaassaaq.
Ataasiinnarmik isaaveqarnermik (One Door) periuseqarneq innuttaasut innarluutillit kommunimit ersarinnerusumik sullinneqarnissaannik siunertaqartoq nalilersuiffigineqassaaq. Siunertaq pitsaasuusoq misilittakkat takutippaat, aaqqiissulli ilaanni aporfeqarsinnaasarpoq. Taamaammat misissueqqissaarnermi paasiniarneqassaaq aaqqissuusineq naatsorsuutigisatut ingerlanersoq aamma innuttaasunik sullissineq ataqatigiinnerusumik piffissartornannginnerusumillu ingerlassappat sukaterisoqassanersoq.
Meeqqanut inuusuttunullu atugarliortunut suliniutit missingersuutinut isumaqatigiissummi aamma annertusaaffigineqarniarput. Inersimasut meeqqap eqqaaniittut uani apeqqutaalluinnarput, soorlu ilinniartitsisut, perorsaasut, klubbini sulisut aamma isumaginnittoqarfimmi sulisut qaninnerusumik eqaannerusumillu suleqatigiinnerat eqqarsaatigineqarluni. Ilinniartitsisut allallu meeqqamik sullissisut taassaanerusarput meeqqap atugaliorneranik pasitsaassaqaqqaartuusartut. Amerlasuulli kommunip kingusinaarluni ikiuutilertanera imaluunniit suliamik aallartitsinialuusaartarnera misigisarpaat. Taamaammat meeqqat inuusuttullu ajornartorsiuteqarpallaalinnginneranni pasitsaassineq piffissaagallarnerani iliuuseqarfigineqarsinnaaqqullugu suleqatigiinneq pitsanngorsarneqassaaq. Atugarliortoqarneranik pasitsaassat iliuuseqarfigiaarneqarpata meeqqat inuusuttullu siunissami ingerlalluarlutik toqqissisimallutillu inuusinnaanissaannut periarfissaqarluarnerulersitsissaaq.
Misissueqqissaarneq naammassippat kommuni ataatsimut aalajangiinissamut tunngavissaqalissalluni ilimagaa, suliassaqarfinnilu erseqqinnerusumik pitsaanerusumillu aaqqissuussinissaq periarfissaalissaaq – sullissinerit sivikinnerusut, paatsooqatigiinnerit ikinnerusut aamma aalaakkaanerusumik sullinneqarneq. Sulisunik isornartorsiuineq pineqanngilaq, sulianilli naammassinninnissamut pitsaanerusunik atugassaqartitsinissaq aamma innuttaasut kommunip ataqatigiinneruneranik misiginissaat qulakkeerniagaavoq.
Innuttaasut tamarmik kisimiitinneqannginnissaat kommunalbestyrelsep anguniagaralugu naqissuserpaa. Meeqqat inuusuttullu pillugit aaqqissuussaalluarnerusumik suleqatigiiffiulluarnerusumillu aamma isumaginnittoqarfimmi erseqqinnerusumik suleriuseqarnermi kommunimi tapersersugassaanerpaat toqqissisimallutik naleqartinneqarlutillu inuunissaat qulakkeerneqassaaq.