2026-mut missingersuutinut isumaqatigiissut Kommuneqarfik Sermersuumi kommunalbestyrelsemi tamanit akuersissutigineqarpoq, partiillu tamarmik akisussaassuseqartumik aningaasaqarnermik aamma kommunimut tamarmut tunnganissaanik anguniagaqarlutik suleqataapput.
”Missingersuutinut isumaqatigiissut partiit tamarmik aammaarlutik akuerisaat saqqummiussinnaaleratsigu nuannaarutigaara. Tamanna suleqatigiilluarnermik aamma tamat oqartussaaqataanerannik pingaartitsinermik ersersitsivoq,” borgmester Avaaraq Olsen oqarpoq.
Missingersuutit sinneqartoorfiunerat pitsaasuusoq
Missingersuutit sinneqartoorfiulluarput, piffissarlu aggersoq aningaasarsiorfiulluassanngipalluunniit ukiup tulliani aningaasaqarneq ajunngitsumik inissisimasussaassaaq. Missingersuutinut isumaqatigiissut ingerlatsinermut, ineriartortitsinermut aamma suliniutinut nutaanut aningaasaliinissamut periarfissaqartitsivoq, taakkulu atugarissaarnermut aamma kommunimi tamani innuttaasut ulluinnaannut nukittorsaataassapput.
Ukioq manna missingersuutinut isumaqatigiissummittaaq kommunip suliffeqarfiutaanik nukittorsaasoqarniarpoq, tassani Iserimut aamma Nuup Bussiinut tunngatillugu piginnittuuneq pillugu periusissiornissaq pineqarluni. Kommunimi tamani inissiat nutaaliat amerlanerulernissaat aamma illoqarfiup alliartorneranut malinnaasinnaanerusumik ataatsimut angallassineq periusissiami qulakkeerneqassaaq. Iserit iniutigisaminik nakkutiginninnerussaaq aamma ininik qanoq ittunik assigiinngitsunik siunissami ineriartortitsinissamik isumaginnissalluni. Nuup Bussiinut tunngatillugu garagenut, bussit amerlanerulernissaannut aamma Nuummi innuttaasoqaleriartuinnartumi ingerlaarfiit tulluartuunissaannut aningaasaliinissamut pilersaarsaarusiornissaq periusissiami anguniarneqassaaq.
Kommuni tamarmi ukkatarineqartoq
Missingersuutinut isumaqatigiissutip illoqarfinni nunaqarfinnilu tamani malugineqarnissaa anguniarneqarpoq. Suliniutissatut akuerineqartut ilaat ukuupput:
- Ittoqqortoormiini illoqarfimmi aqutsisutut atorfimmik nutaamik pilersitsinikkut sumiiffimmi aaqqissuussaanermut nukittorsaassaaq aamma innuttaasut, ingerlatsinermi suliassat kommunimilu aqutsisut akornanni sulineq pisariillisarneqassaaq. Illoqarfimmi aqutsisuulersussat nutaat qulakkiissavaat suliani sukkanerusumik aalajangiisarneq, illoqarfimmi neqeroorutinik pitsaanerusumik ataqatigiissaarineq aamma sumiiffimmi annertuumi assartuiniarnikkut unammillernartoqartumi kommunip sullissinera qanilaarnerusoq.
- Tasiilap nunaqarfiini innuttaasunik sullissineq pitsaanerusoq anguniarlugu ukiuni marlunni misiligutaasumik pitsaanerusumik atugassaqartitsineq aamma nunaqarfinni anginerni pingasuni sulisut sulinerminni tapersersorneqarnerunissaat qulakkeerneqassaaq. Sullissineq aalaakkaanerusoq aamma sulinermi ilungersortoqannginnerunissaa anguniarneqarpoq, innuttaasullu namminneq najugarisaminni sukkanerusumik pitsaanerusumillu siunnersorneqartarnissaat qulakkeerniarneqarluni.
- Paamiuni Qeqertarsuatsiaanilu atuarfinnik iluarsartuussinissamut aningaasanik immikkoortitsinermi atuartitsiffiusunik ullutsinnut tulluarsaanerunissaq aamma atuartut sulisullu atuarfimmi atugarissaarnerunissaat anguniagaavoq. Paamiuni pitsanngorsaanerit aallartereersut ingerlaqqissapput, Qeqertarsuatsiaanilu iluarsartuussinissaq aasaq sioqqullugu aallartisarneqariissaaq. Suliniutit kommunip meerartaasa toqqissisimanartuni, peqqinnartuni aamma periarfissagissaartumi ilikkagaqarnissaannut qulakkeerinnissapput.
- Ilinniartitsisunik pikkorissaaneq aamma meeqqanik immikkut pisariaqartitsisunik nukittorsaaneq anguniarlugu atuartitsinermik pitsangorsaanissamut aamma ilinniartitsisut sulinerminni pitsaanerusunik sakkussaqaqqullugit 8 millionit koruunit immikkoortinneqarput. Saniatiguttaaq atuartunik immikkut pisariaqartitsisunik tapersersuineq nukittorsarneqassaaq, taamaalilluni meeqqat tamarmik qanoq tunuliaqutaqarnerat apeqqutaatinnagu ingerlalluarlutillu ilikkagaqarnissaminnut periarfissagissaarneruniassammata.
- Tasiilami aqquserngiornerit asfaltilersuinerullu ingerlateqqinneqarnissaat angallannerup isumannaatsuunissaanut iluaqutaassaaq aamma illoqarfiup ilaani nunakkut periarfissaluttumi pitsanngorsaataassalluni. Aningaasaliissutit aqquserngit, ikaartarfiit majuartarfiillu pitsanngorsarnissaannut atorneqassapput, taamaalilluni nunap atortulersugaanera ulluinnarni aamma sumiiffimmi suliaqarfiunerujartuinnartumi pitsaaneruleqqullugu.
- Aningaasat utoqqarnut agguagassat nutaat aallaavigalugit suliniutinik ineriartortitsineq, tassa kommuni pitsaanerusumik pilersaarusiorsinnaaqqullugu aamma illoqarfinni nunaqarfinnilu tamani utoqqarnut nutaanik neqeroorusiornissamut salliutsitsisinnaaqqullugu aningaasaliissutaasartut ataatsimoortinneqassapput. Sanaartornissamut pilersaarusiorneq eqaannerusoq aamma suliniutit, soorlu Nuummi puigortunngortut angerlarsimaffissaat, Tasiilami utoqqaat illuat nutaaq aamma Ittoqqortoormiini inissiat utoqqarnut naleqqussakkat aningaasani agguagassani qulakkeerneqassapput.
- Qeqertanut ineriartortinneqassaaq sullorsuarlu marlunnik ingerlavissalik piareersarneqarluni, kommunillu naalagaaffiup Nuummi umiarsualiveqarfimmik alliliinera tapersersorpaa aamma sumiiffimmi periarfissanik inuussutissarsiornermut nukittorsaataasussanik kommuni nammineq sulianik aallartitsivoq. Aammattaaq Nuup Nuussuullu akornanni sullorsuarmik marlunnik ingerlavissalimmik siunissami sanasoqarsinnaanissaanut misissuinerup aallartinnissaanut aningaasanik immikkoortitsisoqarpoq.
- Aalisarnermut tunngatillugu ineriartortitsinissaq missingersuutinut isumaqatigiissummittaaq pingaartinneqarpoq, aalisarnermi tassaavoq kommunip annersaani suli inuussutissarsiutini ingerlatitsisuusoq. Suliniummi ilaatigut pineqarput pissutsit qanoq innerinik misissuineq aamma umiatsianut iluarsartuussivinnik puttasunillu pitsanngorsaaneq, aamma najukkami ineriartortitsiniarnernut tapersersuineq. Tamanna aalisartunut piniartunullu pitsaanerusunik atugassaqartitsissaaq aamma avinngarusimanerusuni inuussutissarsiornerup tunngaviata nukittorsarnissaanut iluaqutaassalluni.
Kommunittaaq suliniutitut ingerlateqqitassai tassaapput sunngiffimmi sammisassanik ineriartortitsineq, peqatigiiffilerinermik tapersersuineq aamma atugarissaarnissamik suliaqarfiusuni tamani suliniutit ataqatigiinnerunissaannik qulakkeerinninneq.