2026-mi Nuummi Najukkami Ataatsimiititaliamit suliniutinik arlalinnik aallartitsisoqassaaq, illoqarfimmik toqqissisimanerulersitsisumik, takujuminarnerulersitsisumik uummaariffiunerusumillu – qaammaqqutit, eqqumiitsuliat aamma innuttaasut peqataanerunissaat ukkatarinerullugit.
Najukkami Ataatsimiititaliami siunnerfilimmik suliaqartoqarpoq, Nuummi illoqarfimmi avatangiisit toqqissisimanarnerulernissaat takujuminarnerulernissaallu anguniarlugu. Ukkatarineqartut pingaarnerit tassaassapput, illoqarfimmi taarnersani qaammaqqutilersuinikkut pitsanngorsaasoqarnissaa, aqquserngit qullilersuiffigalugit qaammaqqutinillu kusassaatinik ikkussuiffigalugit.
Suliniummi aqquserngit qaammaqqusersorneqaannassanngillat, aammali innuttaasunut nuannersuunissaa toqqissisimaffiunissaalu pilersikkusunneqarpoq – pingaartumik illoqarfiup ilaani, ulluinnarni taarnerpaaffiusartuni. Peqatigitillugu Najukkami Ataatsimiititaliamit annertuumik takujuminarsaaffigineqartussatut ukkatarineqartut tassaapput illoqarfiup ilaaniittut Qinngorput, Nuussuaq aammalu sumiiffiit Nuup sinneraniittut:
”Eqqumiitsuliat, qalipaatit aammalu ilusilersukkat illoqarfiup ilisarnaataanik nukittorsaataajumaartut innuttaasunullu tamanut ulluinnarni nuannaarutaallutik,” Nuummi Najukkami Ataatsimiititaliamit nalunaarutigineqarpoq.
Innuttaasut suliniuteqarusuttut qinnuteqaateqarnissaannik kaammattuineq
Najukkami Ataatsimiititaliami aamma pingaartinneqarpoq Nuummi innuttaasunik oqaloqateqartarnerup peqataatitsisarnerullu ingerlateqqinneqarnissaa. Taamaattumik Najukkami Ataatsimiititaliamit soqutiginnittunut tamanut kaammattuutigineqarpoq innuttaasutut suliniutigerusutamik, illoqarfiup ineriartortinneqarnissaanut iluaqutaasussamik, siunnersuuteqarnissaq imaluunniit qinnuteqaateqarnissaq. Suliniutit annikitsuuppata annertuujuppataluunniit, taava innuttaasut tamarmik innuttaasutut suliniuteqarnissamut aningaasaliissutinik qinnuteqateqarsinnaapput.
Linki ataaniittoq takuuk: https://sermersooq.gl/kl/nuummi-najukka-i-ataatsimiititaliamut-aningaasartuutinik-qinnuteqarit/
Innuttaasutut suliniutigerusutamut aningaasaliissutinik qinnuteqaateqarnermi ulloq piffissaliussaq kingulleq tassaavoq januaarip 24-at 2026.
Illit innuttaasutut kissaateqarpit imaluunniit Nuummi sumiiffiit ilaannut isumassarsiaqaannarpit, taava aamma Najukkami Ataatsimiititaliamut uunga allagaqarsinnaavutit nuuklokaludvalg@sermersooq.gl