Kommuneqarfik Sermersooq siammarterinermi ingerlanneqartumi alloriaateqaqqippoq. Maanna kommunimit najukkami pisortat pingasut nutaat toqqarneqarput, taakku isorliunerusortatsinni siuttuussapput najukkamilu peqataanermik pitsanngorsaassallutik.
Hjørdis Viberg Tasiilami nunap immikkoortuani pisortanngorpoq, illoqarfimmut nunaqarfiinullu akisussaasuussalluni. Heidi Jeremiassen Paamiuni nunap immikkoortuani pisortatut toqqarneqarpoq, illoqarfimmi nunaqarfimmilu sulinermik aqutsisuussalluni. Charlotte Pike Ittoqqortoormiini illoqarfimmi pisortanngorpoq.
Peqatigitillugu pisortat nutaat pingasuusut kommunip aqutsisoqatigiivini qullersanut ilanngutissapput massakkumiillu pisortaqatigiit ataatsimiinneranni peqataasassallutik.
– Najukkami pisortanik toqqaanermi siammarterinitsinni pingaarutilimmik alloriaateqaqqippugut. Najukkami aqutsinerup nukittunerulernissaa pineqarpoq, matumani aalajangiinerit pineqartunut qaninnerusumik aalajangerneqartarniassammata aamma innuttaasut kommunip qanilaartuneranik tusarnaartuuneranillu misiginiassammata. Isorliunerusut tamarmik aqutsisoqatigiinnut toqqaannartumik attaveqarsinnaasutut aamma pisariaqartitaat siunnersuutaallu pimoorunneqartutut misiginissaat kissaatigaarput. Tamanna tatiginninnermik, peqataatitsinermik kommunimilu assigiinngitsuni suleqatigiinnermik pitsaanerulersitsineruvoq, borgmesteri Avaaraq Olsen oqarpoq.
Siammarterineq immaqa massakkut annikitsuinnarmik misigineqarsinnaavoq kisianni najukkami pisortanik toqqaaneq kommunip ersarinnerusumik, qaninnerusumik najukkamiinnerusumillu ingerlanneqalerneranut aallarniutaavoq.
CharlottePikep oqaatigaa, siammarterineq innuttaasut aalajangiisartullu akornanni qaninnerusumik attaveqalersitsinermut tunngassuteqartoq:
– Siammarterineq nuannaarutigeqaara, pissutigalugu kommunimit najukkamiittuusugut tatigineqarnitsinnik takutitsinerummat. Sumiiffitsinnut ilusilersuisuusunik aalajangiinerni ilaatinneqartarpugut peqataatinneqarlutalu – tamanna allannguuterujussuuvoq. Maani Ittoqqortoormiini innuttaasunut qaninnerulernerput aamma suleqatigiinnerup nukittunerulernera malugisinnaalereerparput,Charlotte Pike oqarpoq.
Siammarterinermik atuutsitsilerneq ingerlaavartumik ingerlaqqissaaq najukkamilu ingerlatsinerup pitsaaneruleriartornera ilutigalugu innuttaasut allannguutinik aalajangersimasuik misigisaqartassapput.