Discgolfbanimik pilersitsinissamut nunaminertamik akuersissut pillugu qinnuteqaat Sanarfinermut Avatangiisinullu Ingerlatsivimmit tiguneqarpoq. Akuersissut ukiunut tallimanut killilerlugu qinnutigineqarpoq.
Qinnuteqartup discgolfbane qulingiluanik ikisiffissalik pilersissallugu kissaatigaa, taannalu misilittagalinnit, aatsaat aallartittunit, meeqqanit immikkoortumilu sukisaarsaatigalugu atuisunit atorneqarsinnaassaaq. Atuisut assigiinngitsuusinnaanerat qulakkeerniarlugu putut tamarmik immikkut marlunnik aallartittarfilerneqarnissaat pilersaarutaavoq: Inersimasunut sungiussisimasunullu nalinginnaasoq/nalunarnerusoq taavalu nalunannginnerusoq/meeqqanut aallartiffissaq.
Golfertarfissaq pilersinniarlugu immikkoortut makku ikkunniarneqarput:
- 9 kurve – putumut ataatsimut ataatsit: Kurvit qaqqami 50 cm missaanni angissusilimmik qillerisoqarneratigut ikkunneqassapput 1,5 meterillu tungaannut portutigissallutik.
- Tee-steder/-bokse: Teested-it tamarmik immikkut 4,2 x 1,5 meterinik aallartiffeqassapput. Aallartiffiit manissuinnaaniassammata apisarneranillu portunerulaartillugit, tassa nunataanut eqqaaniittumut naleqqussarlugit 50 aamma 100 cm missaannik qaffanneqassapput.
- Issiaviit takisuut: Teested-ini arlalinni issiavinnik takisuunik inissiisoqassaaq, taakkulu sanioqquttunit golfertunullu ataatsimoorfittut atorneqassapput.
- Bane ajornannginnerit nalunaaqutsersorneri: Putut tamarmik immikkut qeqqata missaanni allagartaliisoqassaaq meeqqat aallarterlaallu aallartiffissaannik takussutissiisunik.
Ikkussukkat pinngortitamut akornutaannginnissaat pingaartinneqassaaq. Immikkoortut nuunneqarsinnaassapput. Pilersaarusiornermi atortut mingutsitsisuunngitsut kusanartuliallu atorneqarnissaat pingaartinneqassaaq, taamaalilluni sanaartugaq nunataanut sapinngisamik naleqqussarneqarluni. Aqqusineeqqat, arpattut aqqutaat immikkoortullu sukisaarsarfiit allat pioreersut eqqarsaatigalugit bane-mi aqqutit inissinneqassapput, atuisut taamaalillutik isumannaatsumik akornusersorneqaratillu ingerlasinnaaniassapput.
Immikkoortoq Quassussuup Tungaani Iliveqarfimmut kommunimut pilersaarummut tapiliussamut 3D2-mut aamma Nuffiumarngup kangianut 3D10-mut ilaatinneqarpoq, tassa sukisaarsarfimmut siunertamut atuineq aalajangersagaalluni.
Sukisaarsarfittut naleqartitat eqqarsaatigalugit immikkoortoq killilersugaavoq, aamma atortulersuutinut atajuartussanut sanaartornissamut periarfissiisoqanngilaq. Taamaattumik qinnuteqaat tamanut tusarniaassutigineqassaaq taamaalillutik innuttaasut soqutigisaqaqatigiillu allat pilersaarummut oqaaseqaateqarniassammata.
Qinnuteqaammut oqaaseqaatissaqaruit akerliliissutissaqaruilluunniit, taakkua Sanarfinermut Avatangiisinullu Ingerlatsivimmut kingusinnerpaamik ulloq 9. decembari 2025-mi nassiunneqassapput.
Tusarniaanermut akissutit BOG-2020-11112-337-mik nalunaaqutseqquneqarput.
Akissutit uunga nassiunneqassapput:
Kommuneqarfik Sermersooq
Sanarfinermut Avatangiisunullu Ingerlatsivik
Nunaminertanut tunngasunik oqartussaqarfik
3900 Nuuk
