Kalaallit Nunaanni sullivinni avatangiisit pillugit ilinniartitaanerit tamanit peqataaffigisassat pillugit nalunaarummut missingiummut nassiunneqartumut tusarniaanermut akissuteqarnissamut periarfissinneqarnerput qujassutigaarput.
Nalunaarutip nikerarnerusinnaanermut, pingaartumik internetsikkut ilinniartitsisinnaanermut aamma ilinniarnerup sivisussusaanik sivikinnerulersitsinissamut periarfissamut ammaassinera pitsaasutut isigaarput.
Taamaattorli najukkani atugassarititaasut ernumassuteqalersitsisut eqqumaffigineqarnissaat kissaatigaarput:
1. Tunumi internetseqarnerup ingerlatsinikkullu isumannaallisaanerup killeqarnera: Illoqarfitta nunaqarfittalu arlallit – pingaartumik Tunumi – suli qaammataasanut attaviit pisariaqartippaat, taakkualu ajoraluartumik internetsikkut naammaginartumik ilinniartitsinermik naammassinninnissamik qulakkeerinninnissamut patajaappallaanngillat. Taamaattumik kajumissaarutigaarput suli sumiiffinni taakkunani takkulluni ilinniartitsinernik neqerooruteqartoqartassasoq, taamaasillutik peqataasut tamarmik ilinniarnermik tamakkiisumik assigiimmillu pissarsiaqarniassammata.
Tusarniaanermut atortumi allassimanngilaq, qanoq annertutigisumik takkulluni ilinniartitsisoqartarniarnersoq.
2. Akunnerit ikilineqarnissaat pillugu ernumassuteqarneq:
Allassimasutut akunnerit 22-t qallunaat ilusaat malillugu naammakkaluartoq, ilinniartitsinerup siammasissuunissaanut Kalaallit Nunaannilu suliffeqarfinnik tamanik peqataatitsiffiunissaanut naammannersut ernumassutigaarput.
Suliat qaffasissusaat pissarsiarineqartullu ajornerulinnginnissaat – pingaartumik kalaallinut nunaannut tunngatillugu, tassani qallunaanniit killiliussat allaanerungaatsiarmata, nalilersuinerit malinnaavigineqaqqissaarnissaat innersuussutigaarput.
Neriuppugut isummersuutigut suliap ingerlaqqinnerani ilanngunneqassasut aamma soorunami oqaloqatigiinnerunissamut piareersimavugut.