Inatsisartuni ilaasortanut
Inatsisartuni meeqqat ilaqutariillu sanngiinnerusut pillugit sammisanik eqqartuisoqartillugu oqallinnerup eqqortumik assigiinngisitaartumillu tunngaveqarnissaa pingaaruteqarpoq.
Piffissami kingullermi Kommuneqarfik Sermersuumi borgmesterimit oqaatigineqarsorisagaanerit innersuussutigineqartarput, aammalu meeqqanik angerlarsimaffiup avataanut inissiinernut ilaqutariillu inissaqarniarnerannut tunngasuusarlutik. Oqaaserineqartut tamakkua pissutsinut piviusunut naapertuutinngillat.
Kommuneqarfik Sermersuumiit kissaatigineqarpoq erseqqissassallugu, meeqqat inissaaleqineq imaluunniit aningaasaqarnermut tunngasut pissutigalugit angerlarsimaffiup avataanut inissinneqarneq ajormata. Angerlarsimaffiup avataanut inissiineq pisarpoq, meeqqap atugarissaarnera isumannaatsuunissaalu pillugit suliatigut naliliisoqareerneratigut.
Ilaqutariit tapersersornissaat pillugu siunnerfilimmik kommune sulivoq, taamaalilluni meeqqat periarfissaqartillugu isumannaatsuugaangallu angerlarsimaffimminniinniassammata pissutsit inissaqarniarnermut tunngasut pineqartillugit, ilaqutariit ataatsimoortillugit nukittorsarneqarnissaannut aaqqiissutissanik ujartuilluni ingerlatsiviit akornanni suleqatigiittoqartarpoq.
Assersuutitut taaneqarpoq, Kommuneqarfik Sermersuumi qanittukkut ilaqutariit 17-it katillugit 39-inik meerartallit meeqqamik angerlartinnissaannut piareersimagaluartut, kisiannili inissaqarniarneq peqqutaalluni meeqqat inuusuttullu ingerlaannaq angerlartinneqarnissaat pisinnaasimanngitsoq. Meeqqat ilaqutariillu taakkua Tasiilamiittut pineqarput, tamatumalu takutippaa, unammilligassat najukkani pissutsinut tunngasuusut, kommune tamakkerlugu pinnani.
Tasiilami inissianik attartortittakkanik, kommunip attartorsinnaasaanik pissarsiniarneq ajornakusoortuuvoq, taavalu Nuummi taamatut pisoqartillugu inissianik namminersortunit pigineqartunik attartortoqarsinnaasarluni, taamaalillutik meeqqat siornatigut angerlarsimaffiup avataanut inissinneqarsimasut ilaquttaminnut angerlaqqissinnaalersarlutik.
Oqallinnermi tassani aamma innersuussutigineqarpoq, borgmesteri oqarsimaneragaalluni, meeqqat angerlarsimaffiup avataanut inissinneqarnerat akikinnerusoq inissamik pissarsissunnissaannut sanilliullugu. Tamanna eqqunngilaq. Kommuneqarfik Sermersuumi ilaqutariit ataatsimuuginnarnissaat tunngavigalugu aalajangersimasumik sulisoqarpoq, aammalu suliatigut amerlanertigut naleqqunnerpaassalluni – aningaasaqarneq inunnullu tunngasut eqqarsaatigalugit – ilaqutariit inissarsiorneranni ikiornissaat, taamaalillutik meeqqat angerlarsimaffimminniinniassammata.
Meeqqat ilaqutariillu pillugit tamat oqallinneranni paasissutissat maannakkut pineqartut eqqortut ataqqeqatigiinnerlu tunngavigalugu ataatsimoortumik akisussaaffiuvoq – uani innuttaasunut pineqartunut iluaqutaasussamik.
Inussiarnersumik inuulluaqqusillunga
Avaaraq Olsen
Kommuneqarfik Sermersuumi Borgmesteri